Starlink سپۋتنيكتىك ينتەرنەتىمەن جابدىقتالعان جولاۋشىلار پويىزى نۇرلى جول — ارقالىق باعىتىندا جىل سوڭىنا دەيىن قاتىناۋدى جالعاستىرادى، دەپ حابارلايدى infohub.kz سايتى.
ۇلتتىق تەمىرجول تاسىمالداۋشىسى №225/226 نۇرلى جول — ارقالىق پويىزىنىڭ قاتىناۋ مەرزىمىن 2026 جىلدىڭ سوڭىنا دەيىن ۇزارتۋ تۋرالى شەشىم قابىلدادى. بۇل جولاۋشىلار سۇرانىسىن قاناعاتتاندىرۋ، اقمولا جانە قوستاناي وبلىستارى تۇرعىندارىنىڭ كولىكتىك قولجەتىمدىلىگىن قامتاماسىز ەتۋ، سونداي-اق جولاۋشىلاردى تاسىمالداۋعا قولايلى جاعداي جاساۋ ماقساتىندا جاسالدى.
العاشىندا پويىز جولاۋشىلار اعىنىن زەردەلەۋ ءۇشىن تامىز ايىنىڭ سوڭىنا دەيىن سىناق رەجيمىندە تاعايىندالعان بولاتىن. ازاماتتاردىڭ وتىنىشتەرىن قاراپ، ناقتى سۇرانىستى ەسكەرە وتىرىپ، ونىڭ قاتىناۋ مەرزىمىن جىل سوڭىنا دەيىن ۇزارتۋ تۋرالى شەشىم قابىلداندى. رەيستىڭ ەرەكشەلىگى — Starlink تەحنولوگياسى نەگىزىندە سپۋتنيكتىك ينتەرنەتتىڭ ىسكە قوسىلۋى. سونىمەن قاتار، ىڭعايلى كەستە جولاۋشىلارعا ايماقتار اراسىنداعى ساپارلارىن جايلى جوسپارلاۋعا مۇمكىندىك بەرەدى. جالپى، باعىتتى ۇزارتۋ تۇراقتى كولىك بايلانىسىن قامتاماسىز ەتۋگە جانە جولاۋشىلار تاسىمالىنىڭ ساپاسى مەن قولجەتىمدىلىگىن ارتتىرۋعا باعىتتالعان، — دەپ اتاپ ءوتتى «جولاۋشىلار تاسىمالى» اق باسقارما ءتوراعاسى ءانۋار احمەتجانوۆ.
جولاۋشىلاردى تاسىمالداۋ 2024 جىلى شىعارىلعان RWS Wagon ۆاگوندارىمەن جۇزەگە اسىرىلادى. پويىز قۇرامىندا ءبىر باعىتتا 250-دەن استام جولاۋشىنى تاسىمالداۋعا ەسەپتەلگەن ءۇش كۋپەلىك جانە ءۇش پلاسكارت ۆاگونى بار. ۆاگوندار قاۋىپسىزدىك، سەنىمدىلىك جانە جايلىلىققا قويىلاتىن زاماناۋي حالىقارالىق تالاپتاردى ەسكەرە وتىرىپ جاسالعان. كۋپەلەردە ەرگونوميكالىق ۇيىقتايتىن ورىندار، جەكە جارىقديودتى شامدار، USB-پورتتار جانە جەلىلىك روزەتكالار ورناتىلعان. ۆاگونداردىڭ قىزمەت ەتۋ مەرزىمى — 40 جىلعا دەيىن، — دەپ قوستى ءباسپاسوز قىزمەتى.
پويىز كۇن ارالاتىپ قاتىنايدى. جول بويىندا ول نۇرلى جول، جالتىر، اتباسار، جاقسى، ەسىل، دەرجاۆينسكايا، ارقالىق جانە باسقا دا ستانسيالاردا توقتايدى.