كوپبالالى انانىڭ كەزەكتەن تىس شەكارادان ءوتۋ ارەكەتى قىلمىستىق ىسكە، 100 ساعات قوعامدىق جۇمىسقا جانە وتەماقى تولەۋگە الىپ كەلدى. وقيعا قازاقستان-قىرعىزستان شەكاراسىنداعى «ايشا ءبيبى» وتكىزۋ پۋنكتىندە بولعان، دەپ حابارلايدى infohub.kz.
جامبىل اۋداندىق سوتىنىڭ مالىمەتىنشە، 2026 جىلدىڭ مامىرىندا ايەل وتباسىمەن قىرعىزستاننان قايتىپ كەلە جاتقان. شەكارا بەكەتىندە ول كەزەكتەن تىس وتۋگە تىرىسىپ، كەزەك كۇتىپ تۇرعان باسقا ايەلدەن ەسكەرتۋ العان. ەكەۋىنىڭ اراسىندا سوزگە كەلىس تۋدى. شەكارالىق باقىلاۋدان وتكەننەن كەيىن جانجال جالعاستى. جابىرلەنۋشى بولىپ جاتقان وقيعانى تەلەفونعا تۇسىرە باستاعان، ال سوتتالۋشىنىڭ ۇلى دا سولاي ىستەۋگە تىرىسقاندا، جابىرلەنۋشى ونىڭ گادجەتىن يتەرىپ جىبەرگەن. بۇعان جاۋاپ رەتىندە كوپبالالى انا جۇگىرىپ كەلىپ، قارسىلاسىنىڭ بەتىنەن ۇرعان. توبەلەسۋشىلەردى كۋاگەرلەر اجىراتىپ الدى.
سوت وتىرىسى بارىسىندا سوتتالۋشىنىڭ كىناسى تاراپتاردىڭ ايعاقتارى، بەينەجازبالار جانە سوت-مەديسينالىق ساراپتاما قورىتىندىسىمەن دالەلدەندى. ايەل كىناسىن تولىق مويىنداپ، وكىنىش ءبىلدىرىپ، جابىرلەنۋشىدەن كەشىرىم سۇرادى. جابىرلەنۋشى كوپتەگەن سوققىلار مەن اۋىر جاراقات العانىن ايتقانىمەن، ساراپتاما مۇنى راستامادى. ماماندار الىنعان زاقىمدار دەنساۋلىققا زيان كەلتىرمەگەن دەگەن قورىتىندىعا كەلدى.
پروكۋرور ايەلگە 100 ساعات قوعامدىق جۇمىس تاعايىنداۋدى سۇرادى. سوت ونىڭ بۇرىن سوتتالماعانىن، كىناسىن مويىنداعانىن، وكىنگەنىن جانە بەس كامەلەتكە تولماعان بالا تاربيەلەپ وتىرعانىن ەسكەردى. اۋىرلاتاتىن ءمان-جايلار انىقتالمادى. ناتيجەسىندە ايەل قىلمىستىق كودەكستىڭ 109-1-بابى 2-بولىگىنىڭ 5-تارماعى بويىنشا كىنالى دەپ تانىلدى. وعان 100 ساعات قوعامدىق جۇمىس جازاسى كەسىلىپ، سونداي-اق جابىرلەنۋشىگە 300 مىڭ تەڭگە مورالدىق شىعىن وتەماقىسىن تولەۋ مىندەتتەلدى. ۇكىم زاڭدى كۇشىنە ەندى.