اتىراۋ وبلىسىنىڭ تۇرعىنى سۇلتان سارسەمالييەۆ ءتورت ادامدى ولتىرگەنى ءۇشىن كىنالى دەپ تانىلدى. سوت ۇكىمىن جاريالاۋ بارىسىندا سۋديا زارەما حاميدۋللينا ايىپتالۋشىنىڭ ءوزىن-وزى قورعاۋ جانە اففەكت جاعدايى تۋرالى نۇسقاسىنىڭ نەگە راستالماعانىن ەگجەي-تەگجەيلى ءتۇسىندىردى، دەپ حابارلايدى Politico.kz «اق جايىق» باسىلىمىنا سىلتەمە جاساپ.
سوت سونداي-اق ايىپتالۋشىنىڭ قىلمىس كەزىندە اففەكت جاعدايىندا بولعانى تۋرالى قورعاۋشى تاراپتىڭ ۇستانىمىن دا جوققا شىعاردى.
سۋديانىڭ ايتۋىنشا، جابىرلەنۋشىگە كەمىندە 10 پىشاق جاراقاتى سالىنسا، ونىڭ ۇستىنە كەيىننەن دەنەنى جاسىرۋ ارەكەتتەرى جاسالسا، بۇل جەردە ءوزىن-وزى قورعاۋ تۋرالى ايتۋ مۇمكىن ەمەس. بۇل قىلمىستىڭ ماقساتتى تۇردە جاسالعانىن كورسەتەدى.
سۋديا ناۋرىزدىڭ دەنەسى ولىمىنەن كەيىن 10 ايدان استام ۋاقىت وتكەن سوڭ بارىپ تابىلعانىن ءتۇسىندىردى. دەنەنىڭ قاتتى ءشىرىپ كەتۋىنە بايلانىستى ساراپشىلار تەرىنىڭ امان قالعان تۇستارىنان تەك 10 پىشاق جاراقاتىن انىقتاي العان، الايدا ماماننىڭ قورىتىندىسى بويىنشا جاراقاتتار سانى بۇدان الدەقايدا كوپ بولۋى مۇمكىن.
سونىمەن قاتار قازا تاپقان ءتورت ادامنىڭ دا ولىمىنە اكەلگەن سوققىلار جۇرەك تۇسىنا جاسالعان. ال ماقسوت، ءناسىپ جانە مەيرامگۇلدىڭ قولدارى مەن بىلەكتەرىندە جاراقاتتار انىقتالعان، بۇل ولاردىڭ شابۋىلداۋشىدان قورعانباق بولعانىن دالەلدەيدى.
سوت سوت-پسيحولوگيالىق جانە پسيحياتريالىق ساراپتامانىڭ قورىتىندىسىنا سۇيەندى. وعان سايكەس، سارسەمالييەۆ ەسى دۇرىس دەپ تانىلعان، جۇيكە اۋرۋلارىمەن اۋىرمايدى جانە قىلمىس جاساۋ كەزىندە فيزيولوگيالىق نەمەسە پاتولوگيالىق اففەكت جاعدايىندا بولماعان. سوت فيزيولوگيالىق اففەكتىنىڭ قىسقا مەرزىمدى كۇي ەكەنىن، ال سوتتالۋشىنىڭ ارەكەتتەرى بىرنەشە ايعا سوزىلىپ، جۇيەلى تۇردە جۇزەگە اسىرىلعانىن اتاپ ءوتتى.
سۋديانىڭ سوزىنشە، سارسەمالييەۆ قىلمىسقا الدىن الا دايىندالىپ، سانالى تۇردە ارەكەت ەتكەن، ال كىسى ولىمىنە بۇرىنعى ايەلىنىڭ تۋىستارىمەن اراداعى جانجال سەبەپ بولعان.
«بالالارىن ويلايتىن اكە ولاردى جەتىم قالدىرماس ەدى»
سوتتالۋشىعا قاراتا ايتقان سوزىندە سۋديا ەگەر ول جاقسى كۇيەۋ ءارى جاقسى كۇيەۋ بالا بولعاندا، ايەلىنىڭ اتا-اناسى قىزىن كەرى قايتارىپ الۋعا تىرىسپاس ەدى دەگەندى العا تارتتى.
«ءسىز ناۋرىزدى قاساقانا ءولتىردىڭىز، ال وتباسىنىڭ قالعان مۇشەلەرىن العاشقى قىلمىسىم اشىلىپ قالادى دەپ قورىققاندىقتان ومىردەن قيدىڭىز. ءسىز جازىقسىز ادامداردى ءولتىردىڭىز»، – دەدى زارەما حاميدۋللينا.
سۋديا سوت پروسەسى بارىسىندا سارسەماليەۆتىڭ جابىرلەنۋشىلەر تاراپىنان مۇنداي قاتىگەز قىلمىسقا يتەرمەلەيتىندەي قانداي ارەكەت نەمەسە ءسوز بولعانىن ءتۇسىندىرىپ بەرە الماعانىن باسا ايتتى.
سوتتالۋشى بۇل قىلمىستاردى بالالارى ءۇشىن جاساعانىن العا تارتقانىمەن، سوت بۇل ءۋاجدى نەگىزسىز دەپ تاپتى.
«بالالارىن شىنىمەن ويلايتىن اكە ەشقاشان ولاردى اتا-اناسىز قالدىرمايدى. ول بالالارىنىڭ اناسىن اۋىر جۇيكە اۋرۋىمەن تاستاپ، ولاردىڭ بولاشاعىن ءوز قولىمەن تاس-تالقان ەتپەيدى»، – دەدى سۋديا.
سۋديانىڭ ايتۋىنشا، بۇگىندە بالالار اتا-اناسىنىڭ قاسىندا ەمەس، مەملەكەتتىڭ قامقورلىعىندا وتىر. ءقازىر ولارعا ويىنشىق نەمەسە تاتتىلەر ەمەس، وزدەرى ايىرىلىپ قالعان اتا-انالىق ماحاببات پەن جىلۋلىق قاجەت.
سونداي-اق سۋديا بۇرىنعى ايەلىنىڭ اتا-اناسى سوتتالۋشى ءۇشىن ءوز اكە-شەشەسىندەي جاقىن ادامدار بولۋى ءتيىس ەكەنىن ەسكە سالدى.
«ءسىز ءوز قولىڭىزبەن ولاردىڭ ءومىرىن قيدىڭىز، دەنەلەرىن ءتيىستى تۇردە جەرلەمەي، شۇڭقىرعا تاستاي سالعانسىز. ناۋرىزدىڭ دەنەسى ءۇيدىڭ قاسىندا جاتقانىن بىلە تۇرا، سول جەردە ەش قامسىز ءومىر سۇرە بەردىڭىز. كەيىن مەيرامگۇلدى ءولتىرىپ، شۇڭقىردى قايتا قازىپ، ونى ناۋرىزدىڭ ۇستىنە كومە سالعانسىز. مۇنداي ارەكەتتەردى ادامگەرشىلىك تۇرعىسىنان دا، مورالدىق تۇرعىدان دا اقتاپ الۋ مۇمكىن ەمەس»، – دەدى سۋديا.
ول سوت تالقىلاۋى كەزىندە مايىتتەردى ەكسگۋماسيالاۋ ءساتى تۇسىرىلگەن بەينەجازبالار زەرتتەلىپ، دەنەلەردىڭ قانشالىقتى بۇزىلعانى ايقىن كورىنگەنىن قوسا كەتتى.
«ال ناۋرىز بەن مەيرامگۇل بۇل ءومىردىڭ قانداي قىزىعىن كوردى؟»
سۋديا سوت پروسەسى كەزىندە جابىرلەنۋشىلەردى جاعىمسىز جاعىنان كورسەتىپ، بولعان جاعدايعا ولاردى كىنالى ەتپەك بولعان سارسەماليەۆتىڭ اناسى مەن قارىنداسىنىڭ بەرگەن تۇسىنىكتەمەلەرىنە بولەك توقتالدى.
سۋديانىڭ ايتۋىنشا، قازا تاپقاندار ەندى وزدەرىن قورعاي المايدى، ال سوتقا ۇسىنىلعان دالەلدەر ولاردىڭ دارەسىنە ايتىلعان ايىپتاردىڭ ەشقايسىسىن راستاماعان. سوتتالۋشىنىڭ اناسىنىڭ «بالام ومىردە قىزىق كورمەدى» دەگەن سوزىنە سۋديا قارسى سۇراق قويدى: «ال ناۋرىز بەن مەيرامگۇل بۇل ءومىردىڭ قانداي قىزىعىن كوردى؟».
ول ەكى جابىرلەنۋشىنىڭ دە بالا كەزىنەن مۇگەدەكتىگى بولعانىن، ال ولاردىڭ ءومىرى قايعىلى جاعدايدا ۇزىلگەنىن اتاپ ءوتتى. ولار ەندى ەشقاشان ارماندارىنا قول جەتكىزە المايدى، وتباسىن قۇرىپ، ارتىنان ۇرپاق قالدىرا المايدى.
سوت ايىپتالۋشىنىڭ «بۇكىل ءومىرىن بەس بالاسىن تاربيەلەۋگە جانە اۋرۋ ايەلىنە كۇتىم جاساۋعا ارنادى» دەگەن ءۋاجىن دە قابىلدامادى. سۋديانىڭ ايتۋىنشا، ءوز بالالارى مەن جۇبايىنا قامقورلىق جاساۋ – ەرلىك نەمەسە جازانى جەڭىلدەتەتىن جاعداي ەمەس، ول كەز كەلگەن اتا-انانىڭ تىكەلەي تابيعي مىندەتى.
ۇكىمدى ءتۇسىندىرۋدى اياقتاي كەلە، زارەما حاميدۋللينا سارسەمالييەۆ ءوز ارەكەتىمەن ءبىر ادامنىڭ عانا ەمەس، تۇتاس ءبىر اۋلەتتىڭ تاعدىرىن قۇرتىپ، مارقۇمداردىڭ تۋىستارىنا عانا ەمەس، بۇكىل قوعامعا اۋىر سوققى جاساعانىن اتاپ ءوتتى.
«وتباسىلىق جاعداي قانشالىقتى قيىن بولسا دا، شاڭىراقتى ساقتاپ قالۋعا شىدامدىلىق، جاۋاپكەرشىلىك، ءوزارا قۇرمەت پەن كەشىرىمدىلىك كومەكتەسەدى. اشۋ مەن ىزا ەشقاشان ماسەلەنى شەشپەيدى، ول تەك ورنى تولماس قاسىرەتكە الىپ كەلەدى»، – دەپ تۇيىندەدى سۋديا.