نووكات اۋدانى، وش وبلىسى، قىرعىزستاندا 21 جاستاعى ايجانىل اليكاراەۆا جۇمباق جاعدايدا قايتىس بولدى. ءتورت ايدان كەيىن ونىڭ وتباسى ءمايىتتى ەكسگۋماسيالاۋعا قول جەتكىزىپ، كەيبىر ىشكى اعزالاردىڭ جوق ەكەنىن انىقتادى، دەپ حابارلايدى infohub.kz سايتى.
قايعىلى وقيعا 19 اقپاندا بولدى. قىزدىڭ تۋىستارى العاشقى سوت-مەديسينالىق ساراپتامانىڭ ناتيجەلەرىنە كۇمان كەلتىرىپ، قايتا تەكسەرۋدى تالاپ ەتتى.
ءبىرىنشى ساراپتاما قايتىس بولعان قىزدىڭ جۇكتى ەمەستىگىن كورسەتتى. الايدا، اپكەسى ۋۋلچا ورۋنباەۆانىڭ ايتۋىنشا، ايجانىل قايتىس بولار الدىندا اناسىنا جۇكتىلىگىن دالەلدەيتىن فوتو جانە بەينەجازبالاردى جىبەرگەن.
تۋىستاردىڭ ايتۋىنشا، ەكسگۋماسيا كەزىندە كەيبىر ىشكى اعزالاردىڭ جوق ەكەنى انىقتالعان. اناسى قىزىنىڭ جاتىرى مەن ءبىر بۇيرەگىنىڭ ورنىندا بولماعانىن ايتىپ، ولاردىڭ قايدا جوعالعانىن انىقتاۋدى تالاپ ەتەدى.
كۇيەۋىنىڭ تۋىستارى قىزدىڭ وز-وزىنە قول جۇمساعانىن ايتادى. الايدا مارقۇمنىڭ جاقىندارى بۇل نۇسقاعا سەنبەي، زورلىقپەن ولتىرىلگەن دەپ كۇدىكتەنەدى.
وتباسى ءىستىڭ ءتورت اي بويى سوتقا جەتپەۋىنە نارازىلىق ءبىلدىرىپ، بارلىق جاعدايلاردى جان-جاقتى جانە ءادىل تەرگەۋدى وتىنەدى.
پوليسيا وكىلدەرى كوميسسيالىق سوت-مەديسينالىق ساراپتامانىڭ قورىتىندىسى دايىن بولعاننان كەيىن تۇپكىلىكتى قۇقىقتىق باعا بەرىلەتىنىن مالىمدەدى.