الماتى تۇرعىنى پاتەرىن مەرزىمىندە ءارى ساپاسىز جوندەگەن مەردىگەرگە قارسى سوتقا جۇگىندى. ءىستىڭ ءمان-جايىن infohub.kz سايتى حابارلايدى.
جامبىل وبلىسى سوتتارىنىڭ ءباسپاسوز قىزمەتىنىڭ مالىمەتىنشە، سوت ازاماتشا م.-نىڭ جەكە كاسىپكەرگە قاتىستى قۇرىلىس مەردىگەرلىك شارتىن بۇزۋ جانە اقشا قاراجاتىن ءوندىرىپ الۋ تۋرالى تالابىن قاناعاتتاندىرعان.
2025 جىلدىڭ قازان ايىندا تاراپتار اراسىندا الماتىداعى پاتەردە جوندەۋ جۇمىستارىن جۇرگىزۋگە كەلىسىمشارت جاسالعان. جوندەۋ قۇنى 6،2 ملن تەڭگەنى قۇراعان. تالاپكەر جاۋاپكەرگە جۇمىستىڭ العاشقى ءۇش كەزەڭى ءۇشىن 4،7 ملن تەڭگە تولەگەن. الايدا جوندەۋ تولىق كولەمدە ورىندالماعان، ال جۇمىس ساپاسى مەن قولدانىلعان ماتەريالدار كەلىسىمشارت تالاپتارىنا سايكەس كەلمەگەن.
پاتەر يەسى كەمشىلىكتەردى جويۋدى بىرنەشە رەت تالاپ ەتكەن، ءبىراق ناتيجە بولماعان. سوت دەرەكتەرىنە سايكەس، كەيىن مەردىگەردىڭ پاتەرگە كىرۋى توقتاتىلىپ، شارتتىق قاتىناستار ءىس جۇزىندە اياقتالعان.
جاۋاپكەر تالاپتى مويىنداماي، جۇمىستىڭ ءبىر بولىگى ورىندالعانىن، ال پاتەرگە كىرۋ مۇمكىندىگى بولماعاندىقتان جوندەۋدى اياقتاي الماعانىن مالىمدەگەن.
ساراپتاما قورىتىندىسى بويىنشا، ناقتى ورىندالعان جۇمىستار مەن ماتەريالداردىڭ قۇنى 1،4 ملن تەڭگەنى قۇراعان. بارلىق بولمەلەردەگى پليتكانى بۇزىپ، تولىق اۋىستىرۋ قۇنى 760 مىڭ تەڭگەگە باعالانعان.
سوت مەردىگەردىڭ كەلىسىمشارتتى ەلەۋلى تۇردە بۇزعانىن، سونىڭ سالدارىنان تالاپكەر شارت جاساسۋ كەزىندە كۇتكەن ناتيجەدەن ايىرىلعانىن انىقتاعان.
سوت شەشىمىمەن كەلىسىمشارت بۇزىلعان. جاۋاپكەردەن تالاپكەردىڭ پايداسىنا 3،9 ملن تەڭگە، نوتارياتتىق جانە وكىلدىك شىعىندار، سونداي-اق ساراپتاما شىعىندارى جالپى سوماسى 385 مىڭ تەڭگە وندىرىلگەن.