ەلىمىزدىڭ تۇكپىر-تۇكپىرىندەگى كاسىبي سۋرەتشىلەر الماتىعا ارنالعان جاڭا رەسپۋبليكالىق بايقاۋدا 10،5 ملن تەڭگەلىك جۇلدە قورى ءۇشىن ب ا ق سىناي الادى. ارنايى ءبىلىمى بار كەز كەلگەن ادام جاسىنا، ۇلتىنا جانە تۇرعىلىقتى جەرىنە قاراماستان قاتىسا الادى، دەپ حابارلايدى infohub.kz سايتى.
«اجارلى الماتى!» اتتى بايقاۋ شىعارماشىل ادامداردى قولداپ، وڭتۇستىك استانانىڭ تاريحي، مادەني جانە تابيعي كەلبەتىن ونەر تۋىندىلارى ارقىلى ناسيحاتتاۋدى كوزدەيدى. ۇيىمداستىرۋشىلار بۇرىن كورمەگە قويىلماعان، باسقا بايقاۋلارعا قاتىسپاعان جانە جاريالانباعان ءتۇپنۇسقا اۆتورلىق جۇمىستاردى كۇتەدى.
تۋىندىلار ءۇش تاقىرىپتىڭ بىرىنە ارنالۋى ءتيىس: الماتىنىڭ تاريحي جانە قازىرگى كەلبەتى؛ قالانىڭ تابيعاتى، كورىكتى جەرلەرى مەن ساۋلەت مۇراسى؛ الماتىنىڭ مادەنيەتى، ونەرى جانە قوعامدىق ءومىرى. قاتىسۋشىلار كەسكىندەمە (مايلى بوياۋ، اكريل، تەمپەرا، اكۆارەل)، گرافيكا نەمەسە ارالاس تەحنيكا جانرىندا جۇمىس ۇسىنا الادى. تۋىندىنىڭ ەڭ كىشى ولشەمى — 70 × 80 سم.
جەڭىمپازدارعا مىناداي جۇلدەلەر بەرىلەدى: ءبىرىنشى ورىن — 3 ملن تەڭگە؛ ەكىنشى ورىن — ءارقايسىسى 2 ملن تەڭگەدەن ەكى جەڭىمپاز؛ ءۇشىنشى ورىن — ءارقايسىسى 1 ملن تەڭگەدەن ەكى جەڭىمپاز؛ سونداي-اق 300 مىڭ تەڭگەدەن بەس ىنتالاندىرۋ سىيلىعى قاراستىرىلعان. ماراپاتتاۋ ءراسىمى قىركۇيەك ايىندا الماتى قالاسى كۇنىنە وراي وتەدى، ال ۇزدىك جۇمىستار قورىتىندى كورمەگە قويىلادى. وتىنىمدەر 2026 جىلدىڭ 7 تامىزى مەن 7 قىركۇيەگى ارالىعىندا قابىلدانادى.