قىتايدىڭ شانحاي قالاسىندا Dota 2 بويىنشا ەڭ ءىرى تۋرنير — The International مارەسىنە جەتتى. تاريحي تيتۋلدى ءۇشىنشى رەت Team Spirit كومانداسى جەڭىپ الدى، دەپ حابارلايدى infohub.kz سايتى.
سەربيادا ورنالاسقان رەسەيلىك-ۋكرايندىك ۇجىم گراند-فينالعا تومەنگى تور ارقىلى جولداما الدى. شەشۋشى كەزدەسۋدە Team Spirit 3:2 ەسەبىمەن TEAM VISION كومانداسىن تىزە بۇكتىردى. بۇل كوماندا قۇرامىندا دا رەسەي مەن ۋكراينانىڭ كيبەرسپورتشىلارى بار.
بۇل — كوماندانىڭ The International تاريحىنداعى ءۇشىنشى تيتۋلى، ءتۋرنيردىڭ جاڭا رەكوردى بولدى. بۇعان دەيىن OG جانە Team Liquid ەكى-ەكى رەت جەڭىسكە جەتكەن ەدى.
چەمپيون رەتىندە Team Spirit جالپى جۇلدە قورىنىڭ 42،5 پايىزىن الادى، ول 3،3 ميلليون دوللاردان استى. TEAM VISION كۇمىس جۇلدەگەر رەتىندە وسى سومانىڭ 13 پايىزىن يەلەندى.
The International-دا ءۇشىنشى ورىندى Team Yandex كومانداسى يەلەندى. بۇل كوماندا ساپىندا قازاقستاندىقتار ءالىمجان "Watson" يسلامبەكوۆ پەن ارمان "Malady" ورازبايەۆ، ەكى رەسەيلىك جانە ءبىر ماكەدونيالىق ويىنشى بار. كوماندا جوعارعى جانە تومەنگى توردىڭ فينالىنا دەيىن جەتىپ، سايكەسىنشە TEAM VISION جانە Team Spirit كوماندالارىنان ۇتىلدى. قورىتىندى ناتيجە Team Yandex-كە جالپى جۇلدە قورىنىڭ 9 پايىزىن اكەلەدى.