رەسەيلىك ارنايى كيىم جانە قورعانىس قۇرالدارىن ءوندىرۋشى «تەحنواۆيا» كومپانياسى سەمەيدە ارنايى اياق كيىم شىعاراتىن فابريكا ىسكە قوستى. بۇل — كومپانيانىڭ قازاقستان اۋماعىنداعى العاشقى اياق كيىم فيليالى، دەپ حابارلايدى infohub.kz سايتى.
جاڭا ءوندىرىس 2023 جىلدان بەرى سەمەيدە تىگىن فابريكاسىن باسقارىپ كەلە جاتقان «تەحنواۆيا – كازاحستان» كومپانياسىنىڭ قۋاتىن كەڭەيتتى. اياق كيىم كاسىپورنىندا 30-دان استام جۇمىس ورنى اشىلدى. الداعى ۋاقىتتا ينۆەستور قوسىمشا جابدىق ساتىپ الىپ، الاڭدى ۇلعايتىپ، ءوندىرىس كولەمىن ارتتىرماق.
كومپانيانىڭ تىگىن بولىمشەسى ونەركاسىپ جانە مەديسينا سالالارىنا ارنالعان ارنايى كيىم شىعارادى. ونىڭ جوبالىق قۋاتى جىلىنا 160 مىڭ بۇيىمدى قۇرايدى، ءونىمنىڭ 85%-ى ەكسپورتقا كەتەدى. 2025 جىلى فابريكا 135 171 بۇيىم شىعاردى، ال شتاتىندا 152 ادام جۇمىس ىستەيدى.
2026 جىلى «تەحنواۆيا – كازاحستان» ق ر وتاندىق تاۋار وندىرۋشىلەر تىزىلىمىنە ەندى. اياق كيىم فابريكاسىن ىسكە قوسۋمەن قاتار كومپانيا سەمەيدە فيرمالىق دۇكەن اشىپ، ءوڭىردىڭ التى ءىرى كاسىپورنىمەن — «باقىرشىق تاۋ-كەن كاسىپورنىمەن»، Qazaq-Astyq Group، Eurasia Agro Semey، «ەيكوس»، KondiZ distribution جانە «سيليكات» — ىنتىماقتاستىق تۋرالى مەموراندۋمعا قول قويدى.
«2023 جىلى سەمەيدە ارنايى كيىم وندىرەتىن فابريكا ىسكە قوسقان بولاتىنبىز. ەندى ءوندىرىس اۋقىمىن كەڭەيتىپ، ارنايى اياق كيىم فابريكاسىن اشىپ وتىرمىز. ايتا كەتۋ كەرەك، بۇل — كومپانيامىزدىڭ قازاقستانداعى ارنايى اياق كيىم وندىرەتىن العاشقى فيليالى. ونىڭ ءدال اباي وبلىسىندا، سەمەيدە اشىلۋى ءبىز ءۇشىن ەرەكشە ماڭىزدى. جوبالارىمىزدى جۇزەگە اسىرۋعا جان-جاقتى قولداۋ كورسەتكەن وبلىس باسشىلىعىنا العىس بىلدىرەمىن»، – دەدى «تەحنواۆيا – كازاحستان» باس ديرەكتورى جانات اميرەنوۆ.
اباي وبلىسىنىڭ اكىمى بەرىك ءۋالي جەرگىلىكتى بيزنەستى قازاقستاندىق فابريكالاردان ءونىمدى بەلسەندى ساتىپ الۋعا جانە شەتەلدەن ۇقساس تاۋارلارعا تاپسىرىس بەرمەي، ءوڭىر ىشىندە وندىرىستىك كووپەراسيانى دامىتۋعا شاقىردى.
جوبانىڭ ارتىندا كىم تۇر
«تەحنواۆيا» توبى 1992 جىلى ماسكەۋدە تىركەلگەن، وسى ۋاقىت ىشىندە ول رەسەيدە ارنايى كيىم ءوندىرۋ سالاسىنداعى ەڭ ءىرى كومپانيالاردىڭ بىرىنە اينالدى. رەسەيدە قۇرىلىم 10 تىگىن جانە ءبىر اياق كيىم فابريكاسىن باسقارىپ، جىلىنا 5،5-6 ملن-نان استام تىگىن بۇيىمىن جانە 1،15-1،2 ملن جۇپتان استام ارنايى اياق كيىم شىعارادى.
اشىق تىزىلىمدەردەگى دەرەكتەرگە سايكەس، رەسەيلىك توپتىڭ دا، قازاقستاندىق كومپانيانىڭ دا بەنەفيسيارلارى رەتىندە رەسەيدەن كەلگەن ءۇش كاسىپكەر ارەكەت ەتەدى:
اندرەي پوپوۆ – «فيرما «تەحنواۆيا» باس كومپانياسىنىڭ باس ديرەكتورى جانە نەگىزگى قۇرىلتايشىلارىنىڭ ءبىرى (توپتىڭ ءتۇسىمى ونداعان ميلليارد رۋبلمەن ەسەپتەلەدى). وعان حولدينگكە قاتىستى كومپانيالاردىڭ (فابريكالار مەن ساۋدا ۇيلەرىنىڭ) ۇلەستەرى تيەسىلى.
الەكساندرا كونوروۆا – توپتىڭ بىرنەشە كومپانياسىنىڭ، سونىڭ ىشىندە ماسكەۋلىك «تەحنواۆيا» فيرماسىنىڭ تەڭ قۇرىلتايشىسى.
گالينا ماسلوۆا – «تەحنواۆيا» وربيتاسىنداعى جيىرماعا جۋىق كومپانيانىڭ قۇرىلتايشىسى، باس قۇرىلىم مەن ونىڭ وڭىرلىك فيليالدارىنىڭ كاپيتالىنا قاتىسادى.
«تەحنواۆيا – كازاحستان» قازاقستاندىق بولىمشەسىن جانات امرەنوۆ باسقارادى. ول سونداي-اق جەرگىلىكتى كومپانيانىڭ ءتورت تەڭ يەسىنىڭ ءبىرى.
بۇعان دەيىن «كۋرسيۆ» رەسەيلىك ازامات پەن ەكس-دەپۋتاتتىڭ ۇلىنىڭ كومپانياسى التىن وندىرۋگە 1،2 ملرد تەڭگە جۇمسايتىنىن جازعان بولاتىن.