الەمدىك مۇناي باعاسىنىڭ كۇرت تومەندەۋىنە قاراماستان، قازاقستاندىق تەڭگە دوللارعا قاتىستى نىعايدى. قازاقستان قور بيرجاسىنداعى (KASE) ساۋدا قورىتىندىسى بويىنشا امەريكالىق ۆاليۋتانىڭ ورتاشا ولشەنگەن باعامى 2،58 تەڭگەگە تومەندەپ، 473،40 تەڭگەنى قۇرادى، دەپ حابارلايدى infohub.kz سايتى.
KASE مالىمەتتەرى بويىنشا، دوللاردىڭ ورتاشا ولشەنگەن باعامى ءبىر كۇن بۇرىنعى 475،98 تەڭگەدەن 473،76 تەڭگەگە دەيىن تومەندەدى. ساۋدا بارىسىندا مامىلەنىڭ ەڭ تومەن باعاسى 470،27 تەڭگە، ەڭ جوعارىسى – 476،59 تەڭگە بولسا، جابىلۋ باعامى – 475 تەڭگە. ساۋدانىڭ جالپى كولەمى 433،5 ميلليون دوللارعا جەتىپ، 1 246 مامىلە جاسالدى.
استانا جانە الماتى ايىرباس پۋنكتتەرىندە كەشكە قاراي امەريكالىق ۆاليۋتانى ساتۋدىڭ ەڭ جوعارى باعامى 477 تەڭگەگە جەتتى.
ال مۇناي نارىعى دۇيسەنبىدە قىسىمعا ۇشىرادى. كۇن ىشىندە Brent ماركالى مۇنايدىڭ باعاسى تاڭەرتەڭگى كوتەرىلىستەن كەيىن كۇرت تومەندەپ، 6%-دان استامعا ارزاندادى. باعامى باررەلىنە شامامەن 87،6 دوللارعا دەيىن ءتۇستى، الايدا كەيىن شىعىننىڭ ءبىر بولىگى قايتارىلدى. استانا ۋاقىتى بويىنشا 17:30-دا باعام باررەلىنە 90،44 دوللارعا دەيىن كوتەرىلدى، ءبىراق بۇل الدىڭعى دەڭگەيدەن 6،33 دوللارعا نەمەسە 6،54%-عا تومەن.
بۇگىن قازاقستان مۇنايىن كاسپي قۇبىر كونسورسيۋمى (كتك) ارقىلى ەكسپورتتاۋ ۇشقىشسىز ۇشاتىن اپپاراتتار مەن كاتەرلەردىڭ شابۋىلىنان كەيىن قايتا جاندانعانى بەلگىلى بولدى. ەسكە سالايىق، كتك 20 شىلدەدە تەڭىز تەرمينالىنىڭ جانىنداعى تانكەرگە ۇشقىشسىز ۇشاتىن اپپارات شابۋىلداعاننان كەيىن تيەۋدى توقتاتقان ەدى. كتك – قازاقستان مۇنايىنىڭ نەگىزگى ەكسپورتتىق باعىتى، ونىڭ ۇلەسىنە جالپى ەكسپورتتىڭ 80%-دان استامى كەلەدى.