نيدەرلاندىداعى دەلفت تەحنيكالىق ۋنيۆەرسيتەتى مەن رادبۋد ۋنيۆەرسيتەتىنىڭ زەرتتەۋشىلەرى عىلىمي جاريالانىمداردان The Beatles توبىنىڭ اندەرىنە ءۇش مىڭنان استام سىلتەمە تاپتى. ليۆەرپۋلدىك تورتتىكتىڭ مۋزىكاسى اكادەميالىق ەڭبەك اۆتورلارى ءۇشىن ەڭ تانىمال شابىت كوزى بولىپ شىقتى — ول مايكل دجەكسون مەن ەلۆيس پرەسليدەن وزىپ كەتتى، دەپ حابارلايدى infohub.kz سايتى.
گابريەل بۋدەل باسشىلىعىمەن جۇرگىزىلگەن اۋقىمدى زەرتتەۋدىڭ ناتيجەلەرى «PLOS One» جۋرنالىندا جاريالاندى. عالىمدار اكادەميالىق ماقالالاردى جاساندى ينتەللەكت كومەگىمەن تالداپ، اتى اڭىزعا اينالعان توپتىڭ عىلىمعا اسەرىن باعالادى، دەپ جازادى Ars Technica.
Scopus دەرەكقورى مەن زاماناۋي تىلدىك مودەلدەردى پايدالانا وتىرىپ، اۆتورلار ءتۇرلى سالاداعى ميلليونداعان عىلىمي جاريالانىمدى زەرتتەدى. زەرتتەۋشىلەر ليۆەرپۋلدىك تورتتىك ترەكتەرىنىڭ اتاۋلارى مەن جولدارىنا 2237 ناقتى سىلتەمە، سونداي-اق ءسوز ويىنىنىڭ 963 ءتۇپنۇسقا ۇلگىسىن تاپتى.
ماقالا تاقىرىپتارىندا ەڭ كوپ كەزدەسەتىن كومپوزيسيالار قاتارىندا «The Long and Winding Road» (798 سىلتەمە)، «With a Little Help from My Friends» (209) جانە «Here، There and Everywhere» (129) بولدى.
قىزىعى، ChatGPT سياقتى تەحنولوگيالاردىڭ نەگىزىن قالاعان 2017 جىلعى ايگىلى «Attention Is All You Need» ەڭبەگى «All You Need Is Love» حيتىنە سىلتەمە جاسايدى. سونداي-اق تاقىرىپتار اراسىندا كوروناۆيرۋستىڭ سالدارى تۋرالى ماتەريالدا «The lung and winding road» نۇسقاسى كەزدەسكەن.
زەرتتەۋ اۆتورلارى اتاپ وتكەندەي، عالىمدار روك-توپ اندەرىنىڭ ءوپتيميزمىن ءجيى قايتا ويلاستىرىپ، ونى سكەپسيسكە اينالدىرادى: مىسالى، فرازالاردى «دۇشپاندارىمنىڭ ازداعان كومەگىمەن» نەمەسە «ماحاببات — ساعان كەرەگىنىڭ ءبارى ەمەس» دەپ وزگەرتەدى.