شىعىس قازاقستان وبلىسى پوليسياسى ون جىلدان استام ۋاقىتتان كەيىن قۇنى 31 ميلليون تەڭگەدەن اساتىن تيتان قۇيماسىن ۇرلاۋعا قاتىسى بار سوڭعى كۇدىكتىنى ۇستادى، دەپ حابارلايدى infohub.kz سايتى.
وبلىستىق پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، الماتىدا وسكەمەن قالالىق پوليسيا باسقارماسىنىڭ كريمينالدىق پوليسيا قىزمەتكەرلەرى كوپتوننالىق تيتان قۇيماسىن جىمقىرۋ تۋرالى قىلمىستىق ءىس بويىنشا سوڭعى فيگۋرانت بولعان 63 جاستاعى ەر ادامدى ۇستادى.
بۇل قىلمىستىڭ تاريحى 2015 جىلى باستالدى. سول كەزدە وسكەمەندەگى كاسىپورىنداردىڭ ءبىرىنىڭ جۇمىسشىلار توبى قىمبات شيكىزاتتى جىمقىرۋ سحەماسىن ويلاپ تاپتى. قىلمىستىق قول سۇعۋشىلىقتىڭ نىسانى ماسساسى 9 370 كيلوگرامم بولاتىن تيتان قۇيماسى بولدى، ونىڭ قۇنى 31 ميلليون تەڭگەدەن استى. قىزمەت بابىن پايدالانىپ، كۇزەت قىزمەتكەرلەرىمەن كەلىسىپ، قىلمىسكەرلەر كوپتوننالىق جۇكتى باقىلاۋ-وتكىزۋ پۋنكتى ارقىلى كاسىپورىن اۋماعىنان تىسقارى جەرگە شىعاردى. ۇرلانعاندى جاسىرۋ ءۇشىن قۇيمانى كولىك كۋزوۆىنا سالىپ، ءۇستىن ماتامەن جاۋىپ، تەحنولوگيالىق جانە تۇرمىستىق قوقىسپەن جاسىردى. كەيىن مەتالل قايتا ساتىلدى.
تەرگەۋ بارىسىندا پوليسەيلەر قىلمىستىق سحەمانىڭ بارلىق قاتىسۋشىلارىن انىقتادى. ۇرلانعان م ۇلىك تابىلىپ، الىندى، ال فيگۋرانتتار سوت الدىنا كەلدى، الايدا ولاردىڭ بىرەۋى جاسىرىنىپ ۇلگەردى جانە حالىقارالىق ىزدەۋ جاريالاندى.
ۇزاق جىلدار بويى كريمينالدىق پوليسيا قىزمەتكەرلەرى ونى انىقتاۋ جۇمىسىن توقتاتقان جوق. ىزدەۋدەگى ادامنىڭ بولۋى مۇمكىن جەرلەرى، ونىڭ بايلانىستارى مەن كەلىپ تۇسكەن جەدەل اقپارات تەكسەرىلدى.
ون جىلدان استام ۋاقىت وتكەن سوڭ ەر ادام الماتىدا انىقتالدى. ءقازىر 63 جاستاعى كۇدىكتى ۋاقىتشا ۇستاۋ يزولياتورىنا قامالدى. ودان ءارى پروسەسسۋالدىق شەشىمدەر زاڭدا بەلگىلەنگەن تارتىپپەن قابىلدانادى.