قوستانايلىق «توبىل» كونفەرەنسيالار ليگاسىنىڭ ءۇشىنشى ىرىكتەۋ كەزەڭىندە بەلگرادتىق «پارتيزانمەن» كۇردەلى باسەكە كۇتىپ تۇر. كوماندانىڭ باس باپكەرى ميروسلاۆ روماششەنكو مەن شابۋىلشى ۋروش ميلوۆانوۆيچ الداعى ماچتان كۇتكەندەرىمەن ءبولىستى، دەپ حابارلايدى infohub.kz سايتى.
روماششەنكو «توبىل» قارسىلاستىڭ سوڭعى ويىندارىن جان-جاقتى زەرتتەگەنىن جانە كەزدەسۋدىڭ جوعارى قارقىنىنا دايىن ەكەنىن اتاپ ءوتتى. «وتە كۇردەلى ماچ كۇتەمىز. قارسىلاستىڭ سوڭعى ويىندارىن تالدادىق. بۇل — وتە قيىن كوماندا، قۇرامىندا الەۋەتى جوعارى، جەكەلەي العاندا مىقتى شابۋىلشىلار توبى بار. كوماندا وتە جىلدام، شابۋىلدا جاقسى وينايدى»، – دەپ كەلتىرەدى باپكەردىڭ ءسوزىن كلۋبتىڭ ءباسپاسوز قىزمەتى.
باپكەردىڭ ايتۋىنشا، قارسىلىق دەڭگەيى الدىڭعى ماچتارعا قاراعاندا ايتارلىقتاي جوعارى بولادى. «الداعى ماچتا ءبىزدى مۇلدەم باسقا جىلدامدىقتار، باسقا قارقىن كۇتىپ تۇرعانىن انىق تۇسىنەمىز. وسى ويىندا باسەكەگە قابىلەتتى بولۋ ءۇشىن ءبىز سوعان ساي بولۋىمىز كەرەك»، – دەپ اتاپ ءوتتى مامان.
سەربيا فۋتبولىن جاقسى بىلەتىن ميلوۆانوۆيچ تە قارسىلاستىڭ كۇشىن اتاپ ءوتتى، ءبىراق ءوز كۇشىنە سەنىمدىلىك ءبىلدىردى. «ءبىزدى وتە كۇشتى كوماندامەن كەزدەسۋ كۇتىپ تۇر. ءبىراق ءبىز ءوز جۇمىسىمىزعا، بىر-بىرىمىزگە سەنەمىز جانە باپكەرلىك شتابقا تولىق سەنىم ارتامىز. باپكەردىڭ تاپسىرماسىن ورىنداپ، جەڭىسكە جەتۋگە تىرىسامىز»، – دەدى شابۋىلشى.
سەربيالىق شابۋىلشى كوماندالاستارىنىڭ «پارتيزاننىڭ» ەرەكشەلىكتەرى تۋرالى سۇراعانىن ايتتى. «„پارتيزانعا“ قارسى ويناۋ ءارقاشان قيىن. بۇل ۇلكەن كلۋب، كوماندالاستارىم مەنەن ول تۋرالى سۇرادى. ءبىز كىمگە قارسى وينايتىنىمىزدى بىلەمىز. ءبىزدىڭ مىندەتىمىز – جانكۇيەرلەردىڭ سەنىمىن اقتاۋ، ەلدى لايىقتى تانىتۋ جانە وڭ ناتيجەگە جەتۋ»، – دەپ قوستى فۋتبولشى.
ەسكە سالايىق، «پارتيزان» ليۋكسەمبۋرگتىك «ۋنا شتراسسەندى» ەكى ماچ قورىتىندىسى بويىنشا 5:0 ەسەبىمەن جەڭىپ، ءۇشىنشى كەزەڭگە شىقتى. «توبىل» الدىڭعى كەزەڭدە ليتۆالىق «پانەۆەجيستى» وتكىزدى: ەكى ماچ تە 1:1 ەسەبىمەن اياقتالدى، ال قوستانايدا قوسىمشا ۋاقىتتان كەيىن قازاقستاندىق كلۋب پەنالتي سەرياسىندا 3:2 ەسەبىمەن جەڭىسكە جەتتى.
«پارتيزان» مەن «توبىلدىڭ» العاشقى ماچى 6-7 تامىزعا قاراعان ءتۇنى بەلگرادتا وتەدى، جاۋاپ ماچ 13 تامىزدا قوستانايدا بولادى. قارسى تۇرۋ جەڭىمپازى 20 جانە 27 تامىزدا «حەتافەمەن» وينايدى.