قازاقستان ىشكى ىستەر مينيسترلىگى توعىز الەۋمەتتىك جەلى قولدانۋشىسىن قۇقىققا قايشى جانە ازعىن كونتەنت تاراتقانى ءۇشىن اكىمشىلىك جاۋاپكەرشىلىككە تارتتى. بلوگەرلەر لايك، دونات جانە قارالىم ءۇشىن ءقاۋىپتى پرانكتەر ۇيىمداستىرىپ، تىكەلەي ەفيردە بالاعاتتاپ، ادامداردى قورلاعان، دەپ حابارلايدى infohub.kz.
ۆەدومستۆو الدىن الۋ ماقساتىندا بۇزۋشىلاردىڭ ەسىمدەرى مەن لاقاپ اتتارىن اشىق اتادى. جازالانعاندار اراسىندا: استانا تۇرعىنى 37 جاستاعى ينديرا ەشتاەۆا (لاقاپ اتى «باۋىرساق») ترانسلياسيا كەزىندە ۇساق بۇزاقىلىق جانە بالاعات سوزدەر ايتقانى ءۇشىن ايىپپۇل سالىندى. الماتىدان 32 جاستاعى اقتورە باتىربەك (لاقاپ اتى «اقتورە») تىكەلەي ەفيردە قورلاپ، بالاعاتتاعانى ءۇشىن 5 تاۋلىككە قامالدى. شىمكەنتتە 20 جاستاعى دانيار سەيدالييەۆ ەفيردە ادامدى ەلەكترشوكەرمەن ۇرلاۋدى ويناتقان – سوت ونى 8 تاۋلىككە قامادى. جامبىل وبلىسىنان: 41 جاستاعى لايلو كاسىموۆا («التىن قىز») بالاعات ءۇشىن ايىپپۇل سالىنسا، 19 جاستاعى جارقىناي بايبەك پەن اسىلجان تانابەرگانوۆ دونات الۋ ءۇشىن ەفيردە بىر-بىرىنە دەنە جاراقاتىن سالعانى ءۇشىن جاۋاپكەرشىلىككە تارتىلدى.
مينيسترلىكتىڭ رەسمي وكىلى شىڭعىس الەكەشيەۆ جەلىدەگى انونيمدىلىك جازادان قۇتىلۋعا كومەكتەسپەيتىنىن اتاپ ءوتتى. «ءتىپتى ءانونيمدى اككاۋنت نەمەسە تەلەفون ەكرانىنىڭ ارتىنا جاسىرىنۋعا بولادى دەپ ويلاماڭىز. ءىىم كەز كەلگەن بۇزۋشىنىڭ جەكە باسىن انىقتاۋ ءۇشىن بارلىق قاجەتتى قۇرالدارعا يە. ءاربىر وسىنداي فاكت انىقتالادى. ءاربىر بۇزۋشى زاڭعا سايكەس جاۋاپكەرشىلىككە تارتىلادى»، – دەدى الەكەشيەۆ.
ۆەدومستۆو تەكسەرۋلەر ازاماتتاردىڭ كوپتەگەن شاعىمدارى بويىنشا دا جۇرگىزىلەتىنىن، ولار بالالار مەن جاسوسپىرىمدەرگە ءقاۋىپتى ۇلگى كورسەتەتىن دەسترۋكتيۆتى كونتەنتتى قابىلدامايتىنىن قوستى.