قازاقستان پرەزيدەنتى قاسىم-جومارت توقايەۆ ەلوردادا قازاق-قىتاي جاساندى ينتەللەكت مەكتەبىن قۇرۋ باستاماسىن كوتەردى. مەملەكەت باسشىسى بۇل ماسەلەنى پىسىقتاۋدى ۇكىمەتكە تاپسىردى، دەپ حابارلايدى infohub.kz.
بۇل مالىمدەمە رەسپۋبليكالىق تامىز كونفەرەنسياسىندا ايتىلدى. پرەزيدەنتتىڭ پىكىرىنشە، جاڭا تەحنولوگيالار سالاسىنداعى مامانداردى دايارلاۋ مەكتەپ قابىرعاسىنان باستالۋى ءتيىس.
«جاڭا فورماتتاعى مامانداردى دايارلاۋدى مەكتەپتەگى بىلىمنەن ءبولىپ قاراۋعا بولمايدى. ءبىرىڭعاي تىك قۇرىلىم قۇرۋ قاجەت»، — دەپ اتاپ ءوتتى قاسىم-جومارت توقايەۆ.
بيىلعى جىلدىڭ قىركۇيەگىندە قازاقستاندا جاساندى ينتەللەكت ۋنيۆەرسيتەتى جۇمىسىن باستايدى. الايدا، پرەزيدەنتتىڭ ايتۋىنشا، ەلدىڭ بىلىكتى كادرلارعا دەگەن قاجەتتىلىگىن قاناعاتتاندىرۋ ءۇشىن ءبىر عانا وقۋ ورنى جەتكىلىكسىز.
«قىتايدىڭ جاڭا تەحنولوگيالاردى يگەرۋدەگى ۇلكەن تاجىريبەسى مەن جەتىستىكتەرىن ەسكەرە وتىرىپ، استانادا قازاق-قىتاي جاساندى ينتەللەكت مەكتەبىن اشۋ ماسەلەسىن ۇكىمەت پىسىقتاۋى كەرەك»، — دەدى مەملەكەت باسشىسى.
سونىمەن قاتار، توقايەۆ ءوز سوزىندە مەكتەپتە 18 جاسقا دەيىن وقىتۋدىڭ ورىندىلىعى تۋرالى ماسەلەنى كوتەردى. ول مىسال رەتىندە نازاربايەۆ زياتكەرلىك مەكتەپتەرى مەن جەكە وقۋ ورىندارىن كەلتىردى.
«نزم پەن جەكە مەكتەپتەردەگىدەي 18 جاستاعى جاسوسپىرىمدەردى مەكتەپتە ۇستاۋ كەرەك پە دەگەن سۇراق تۋىندايدى. قازىرگى بالالاردىڭ فيزيولوگيالىق دامۋى جەدەلدەگەنىن ەسكەرسەك، بۇل قانشالىقتى ورىندى؟» — دەپ سۇرادى پرەزيدەنت.
مەملەكەت باسشىسى ءتيىستى مينيسترلىككە بۇل ماسەلەنى زەرتتەپ، قاجەت بولعان جاعدايدا شەشۋ جولدارىن ۇسىنۋدى تاپسىردى. سونىمەن قاتار، ول كونستيتۋسيادا بۇكىل ەل بويىنشا ءبىرىڭعاي مەكتەپ ءبىلىمى ستاندارتى قاراستىرىلعانىن ەسكە سالدى.