قازاقستان پرەزيدەنتى قاسىم-جومارت توقايەۆ قىرعىزستان پرەزيدەنتى سادىر جاپاروۆتى ەل تاۋەلسىزدىگىنىڭ 35 جىلدىعىمەن قۇتتىقتاپ، جەدەلحات جولدادى، دەپ حابارلايدى infohub.kz سايتى.
مەملەكەت باسشىسى قۇتتىقتاۋىندا بۇل مەرەيلى كۇن قىرعىز حالقىنىڭ بوستاندىق، ەگەمەندىك پەن تاۋەلسىزدىككە دەگەن ۇمتىلىسىن بىلدىرەتىنىن اتاپ ءوتتى. وسى جىلدار ىشىندە قىرعىزستان قالىپتاسۋدان تۇراقتى دامۋعا دەيىنگى جولدى لايىقتى ءوتىپ، مەملەكەتتىلىگىن نىعايتتى، باي رۋحاني مۇراسىن ساقتاپ، حالىقارالىق ارەنادا بەدەلدى مەملەكەتكە اينالدى. بۇعان ايقىن دالەل — قىرعىز رەسپۋبليكاسىنىڭ بۇۇ قاۋىپسىزدىك كەڭەسىنە 2027-2028 جىلدارعا تۇراقتى ەمەس مۇشە بولىپ سايلانۋى.
قۇتتىقتاۋدا ەلدەرىمىزدى عاسىرلار بويى جالعاسىپ كەلە جاتقان دوستىق پەن تاتۋ كورشىلىك داستۇرلەرىنە نەگىزدەلگەن شىنايى باۋىرلاس قارىم-قاتىناستار بايلانىستىراتىنى اتاپ كورسەتىلگەن. قاسىم-جومارت توقايەۆ ەكى حالىقتىڭ يگىلىگى ءۇشىن ستراتەگيالىق ارىپتەستىك پەن وداقتاستىقتىڭ ودان ءارى قارقىندى نىعاياتىنىنا سەنىم ءبىلدىردى.
قازاقستان پرەزيدەنتى سادىر جاپاروۆقا جاۋاپتى مەملەكەتتىك قىزمەتىندە تابىس تىلەپ، باۋىرلاس قىرعىز حالقىنا بەرەكە مەن باقىت تىلەدى.