قازاقستان پرەزيدەنتى قاسىم-جومارت توقايەۆ ماڭعىستاۋ وبلىسىنداعى وقۋ-جاتتىعۋ كەزىندە اسكەري قىزمەتشىلەردىڭ قازا تابۋىنا بايلانىستى ەلدە جالپىۇلتتىق ازا تۇتۋ جاريالادى. مەملەكەت باسشىسىنىڭ ءتيىستى وكىمى اقوردادا جاريالاندى، دەپ حابارلايدى infohub.kz سايتى.
پرەزيدەنت وكىمىنە سايكەس، 2026 جىلعى 25 قىركۇيەكتە قازاقستان رەسپۋبليكاسىندا جالپىۇلتتىق ازا تۇتۋ جاريالاندى — قىزمەتتىك مىندەتتەرىن اتقارۋ كەزىندە قازا تاپقان اسكەري قىزمەتشىلەرگە بايلانىستى.
قايعىلى وقيعا 24 قىركۇيەكتە ماڭعىستاۋ وبلىسىندا بولدى. قازاقستان رەسپۋبليكاسى قارۋلى كۇشتەرى اسكەري-تەڭىز كۇشتەرىنىڭ وقۋ-جاتتىعۋى بارىسىندا كاسپي تەڭىزى جاعالاۋىندا وقۋ-جاۋىنگەرلىك مىندەتتى ورىنداۋ كەزىندە اۋا رايى كۇرت ناشارلاپ، جەل كۇشەيدى — اسكەري قىزمەتشىلەردى تەڭىزگە اعىزىپ اكەتتى.
قورعانىس مينيسترلىگىنىڭ الدىن الا مالىمەتىنشە، تەڭىزگە 19 اسكەري قىزمەتشى اعىزىلىپ كەتكەن. قازىرگى تاڭدا 9 اسكەري قىزمەتشىنىڭ قازا تاپقانى تىركەلدى.
باس پروكۋراتۋرا اقتاۋ گارنيزونىنداعى وقۋ-جاتتىعۋ كەزىندە اسكەري قىزمەتشىلەردىڭ قازا تابۋى فاكتىسى بويىنشا قىلمىستىق ءىس قوزعالىپ، تەرگەلىپ جاتقانىن حابارلادى.
اقتاۋلىق بلوگەر ازامات سارسەنبايەۆ ماڭعىستاۋ وبلىسىنداعى توتەنشە وقيعا ورنىنان ۆيدەو جاريالادى.
اسكەري قىزمەتشىلەر قازا تاپقاننان كەيىن ۇكىمەتتىك كوميسسيا قۇرىلىپ، وقيعا ورنىنا پرەمەر-مينيستردىڭ ورىنباسارى قانات بوزىمبايەۆ جىبەرىلدى.
پرەزيدەنت قاسىم-جومارت توقايەۆ ماڭعىستاۋ وبلىسىنداعى اسكەري قىزمەتشىلەردىڭ قازا تابۋىنا بايلانىستى كوڭىل ايتىپ، قايعىلى وقيعانى تەرگەۋ جونىندە تاپسىرمالار بەردى.
اقتاۋدا قالا كۇنىنە ورايلاستىرىلعان مەرەكەلىك ءىس-شارالار توقتاتىلدى.