قازاقستان پرەزيدەنتى قاسىم-جومارت توقايەۆ «بايتەرەك» حولدينگىنىڭ باسقارما ءتوراعاسى رۋستام ءقاراعويشيندى قابىلدادى. ول مەملەكەت باسشىسىنىڭ تاپسىرمالارىنىڭ ورىندالۋ بارىسى، حولدينگتىڭ جۇمىس قورىتىندىلارى جانە ودان ءارى دامۋدىڭ نەگىزگى باعىتتارى تۋرالى بايانداما جاسادى، دەپ حابارلايدى infohub.kz سايتى.
كەزدەسۋ بارىسىندا رۋستام قاراعويشين «بايتەرەكتىڭ» ينۆەستيسيالىق جانە نەسيەلىك پورتفەلى 14،3 ترلن تەڭگەگە جەتكەنىن ايتتى. بولجام بويىنشا، بۇل كورسەتكىش 16،5 ترلن تەڭگەگە دەيىن ارتادى. حولدينگتىڭ جىلدىق تازا پايداسى 400 ملرد تەڭگەدەن اسادى.
حولدينگ باسشىسىنىڭ ايتۋىنشا، 2025 جىلدىڭ قورىتىندىسى بويىنشا قولداۋ شارالارىنىڭ ارقاسىندا 77،5 مىڭ وتباسى باسپانامەن قامتاماسىز ەتىلدى، ونىڭ ىشىندە كەزەكتە تۇرعان 11،6 مىڭ ازامات بار.
ول سونداي-اق بيزنەس پەن اگروونەركاسىپ كەشەنىن قولداۋ تۋرالى ايتتى. وتكەن جىلى 77 ءىرى جوبا جانە شاعىن جانە ورتا بيزنەستىڭ 27،4 مىڭ جوباسى قارجىلاندىرىلدى. 131 ەكسپورتتاۋشىعا جانە 7،2 مىڭ اۋىل شارۋاشىلىعى تاۋارىن وندىرۋشىگە قولداۋ كورسەتىلدى، ال كوكتەمگى دالا جۇمىستارىن جۇرگىزۋ ءۇشىن 11،4 مىڭ بىرلىك اۋىل شارۋاشىلىعى تەحنيكاسى ليزينگكە بەرىلدى.
رۋستام قاراعويشين حولدينگتىڭ ترانسفورماسياسى جانە ونىڭ دامۋىنىڭ جاڭا ۇزاق مەرزىمدى ستراتەگياسى تۋرالى بولەك باياندادى. «جوبا اكتيۆتەردى ءتيىمدى باسقارۋعا، كۇشتى بيزنەس ءۇشىن جاعداي جاساۋعا جانە حالىقتىڭ ءومىر ءسۇرۋ ساپاسىن ارتتىرۋعا باعىتتالعان پرواكتيۆتى ينۆەستيسيالىق حولدينگ مودەلىنە كوشۋدى كوزدەيدى»، — دەلىنگەن ۇسىنىلعان باياندامادا.
سونىمەن قاتار، «بايتەرەك» باسشىسى ءبىرقاتار ينۆەستيسيالىق باستامالاردىڭ ىسكە اسىرىلۋى تۋرالى حابارلادى. اعىمداعى جىلدىڭ سوڭىنا دەيىن ينۆەستيسيالىق كەڭەستىڭ قاراۋىنا يمپورتتى الماستىرۋعا، ەكسپورت پەن ينفراقۇرىلىمدى دامىتۋعا باعىتتالعان 26 جوبانى شىعارۋ جوسپارلانۋدا.
كەزدەسۋ قورىتىندىسى بويىنشا پرەزيدەنت تۇراقتى ەكونوميكالىق ءوسۋدى قامتاماسىز ەتۋدىڭ جانە ۇزاق مەرزىمدى ينۆەستيسيالاردى تارتۋدىڭ ماڭىزدىلىعىن اتاپ ءوتتى. سونداي-اق ول شاعىن جانە ورتا بيزنەستى قولداۋدى كۇشەيتۋدى جانە ازاماتتاردىڭ باسپاناعا قولجەتىمدىلىگىن ارتتىرۋعا ەرەكشە نازار اۋدارۋدى تاپسىردى.