قازاقستان پرەزيدەنتى قاسىم-جومارت توقايەۆ ەلدەگى ءبىلىم بەرۋ جۇيەسىن رەفورمالاۋدىڭ قورىتىندىسىن شىعاردى. مەملەكەت باسشىسى ءبىلىم بەرۋ جۇيەسىن دامىتۋ نورمالارى العاش رەت بەكىتىلگەن كونستيتۋسيانى، سونداي-اق بيلىك جۇيەسىن جاڭعىرتۋدى ەسكە سالدى، دەپ حابارلايدى infohub.kz سايتى.
توقاەۆتىڭ ايتۋىنشا، سوڭعى جەتى جىلدا ەلدە 1 ميلليوننان استام وقۋشى ورنىنا ارنالعان 1342 مەكتەپ سالىندى، بيىل تاعى 101 مەكتەپتىڭ قۇرىلىسى ءجۇرىپ جاتىر. «كەلەشەك مەكتەپتەرى» ۇلتتىق جوباسى اياسىندا 460 مىڭ وقۋشىعا ارنالعان جاڭا ستاندارتتاعى 217 مەكتەپ بوي كوتەردى، ولاردىڭ شامامەن 40%-ى اۋىلدىق جەرلەردە.
«قازىرگى تاڭدا مەملەكەت ورتا مەكتەپتەرگە جاساندى ينتەللەكت جۇيەلەرىنە نەگىزدەلگەن ارنايى ساباقتاردى جاپپاي ەنگىزۋ باعدارلاماسىن ىسكە اسىرىپ جاتىر. ۇكىمەت وسى اسا ماڭىزدى جۇمىس باعىتىنا ەرەكشە كوڭىل ءبولۋى كەرەك»، — دەدى پرەزيدەنت.
پرەزيدەنت جاستاردىڭ پەداگوگ ماماندىعىنا قىزىعۋشىلىعىنىڭ ارتقانىن اتاپ ءوتتى.
«بيىل 12 مىڭنان استام تۇلەك، ونىڭ ىشىندە 2 مىڭنان استام «التىن بەلگى» يەگەرى پەداگوگيكالىق ماماندىقتار بويىنشا مەملەكەتتىك گرانت يەگەرى اتاندى. ۇستازدىق جولدى تاڭداعان ستۋدەنتتەردىڭ ستيپەندياسى 2،5 ەسە ءوستى. جاڭا وقۋ جىلىنىڭ قارساڭىندا وڭىرلەردە 15 مىڭنان استام ءمۇعالىم جۇمىسقا ورنالاستىرىلدى، ولاردىڭ جارتىسى — جاس ماماندار»، — دەدى توقايەۆ.
ونىڭ ايتۋىنشا، تاجىريبەلى پەداگوگتەر جاس ارىپتەستەرىن قولداپ، كاسىبي ساباقتاستىق ءداستۇرىن قالىپتاستىرۋى كەرەك. پرەزيدەنت سونداي-اق جوعارى وقۋ ورىندارىنىڭ ءعىلىمي-بىلىم بەرۋ سالاسىنداعى حالىقارالىق ىنتىماقتاستىعىنىڭ ماڭىزدىلىعىن اتاپ ءوتتى.
ءبىلىم بەرۋدى سيفرلاندىرۋ تاقىرىبىنا توقتالعان توقايەۆ ءوزىنىڭ تاپسىرماسىمەن ورتا ءبىلىم بەرۋ جۇيەسىنە جاساندى ينتەللەكتتى كەزەڭ-كەزەڭىمەن ەنگىزۋ باستالعانىن مالىمدەدى.
«بيىل قىركۇيەكتە وقۋ-اعارتۋ مينيسترلىگى ءبىلىم بەرۋدە جاساندى ينتەللەكتتى قولدانۋ ستاندارتىن بەكىتتى. وزىق ادىستەمەلەر مەن سيفرلىق پلاتفورمالارعا ەلدەگى بارلىق مەكتەپ قول جەتكىزەدى، ولار مەگاپوليستە مە، الدە شالعاي اۋىلدا ما — ءبارىبىر»، — دەدى پرەزيدەنت.
ول PISA-2025 حالىقارالىق زەرتتەۋىنىڭ دەرەكتەرىن كەلتىردى: سيفرلىق دايىندىق دەڭگەيى بويىنشا قازاقستاندىق مەكتەپتەر ەىدۇ ەلدەرىنىڭ ورتاشا كورسەتكىشىنەن وزىپ كەتكەن، ال وقۋشىلاردىڭ كوگنيتيۆتىك بەيىمدەلۋ يندەكسى دە ورتاشادان جوعارى.
«ءبىراق بۇل — باستاپقى نۇكتە عانا، وزىنە سەنىمدىلىككە بەرىلۋگە نەگىز ەمەس. الدا ءالى زور جۇمىس كۇتىپ تۇر»، — دەپ اتاپ ءوتتى توقايەۆ.
بۇعان دەيىن ول قازاقستاندىق ۇستازداردى قۇتتىقتاپ، ولاردى ءار ادامنىڭ ومىرىندەگى نەگىزگى تۇلعالار دەپ اتادى.