قازاقستان پرەزيدەنتى قاسىم-جومارت توقايەۆ نيۋ-دەليدە ءوتىپ جاتقان بريكس ءسامميتى اياسىندا اقش پرەزيدەنتىنىڭ وڭتۇستىك جانە ورتالىق ازيا جونىندەگى ارنايى وكىلى سەردجيو گوردى قابىلدادى، دەپ حابارلايدى infohub.kz سايتى.
اقوردانىڭ مالىمەتىنشە، اڭگىمە باسىندا سەردجيو گور قازاقستان تاۋەلسىزدىگىنىڭ 35 جىلدىعى قارساڭىندا دونالد ترامپتىڭ قاسىم-جومارت توقاەۆقا جولداعان جەكە قۇتتىقتاۋىن جەتكىزدى.
«قۇرمەتتى مىرزا پرەزيدەنت! قازاقستان تاۋەلسىزدىگىنىڭ 35 جىلدىعى مەرەكەسى قارساڭىندا وسى ايتۋلى وقيعاعا وراي سىزگە ەڭ جاقسى تىلەكتەرىمدى جولدايمىن. استانادا جانە ەلدىڭ تۇكپىر-تۇكپىرىندە ميلليونداعان قازاقستاندىق 1991 جىلى رەسپۋبليكا تاۋەلسىزدىك جاريالاعاننان بەرى ۇقىپتى ساقتالىپ، بايىتىلىپ كەلە جاتقان باي مادەنيەتتى، تاريحي مۇرانى جانە بىرەگەي سۇلۋلىقتى ماقتانىشپەن اتاپ وتەدى. مەن ەلدەرىمىز اراسىنداعى كەڭەيتىلگەن ستراتەگيالىق ارىپتەستىكتى جوعارى باعالايمىن جانە مەنىڭ ەكى پرەزيدەنتتىك مەرزىمىمدە ءسىز بەن مەنىڭ ارامىزدا قالىپتاسقان تاماشا قارىم-قاتىناستىڭ ودان ءارى دامۋىنا سەنىم ارتامىن. قازاقستان حالقى ءسىزدىڭ تۇلعاڭىزدا كۇشتى ءارى شەشىم قابىلداي الاتىن كوشباسشىعا يە بولۋ باقىتىنا يە. وسى ماڭىزدى بەلەستى اتاپ وتۋگە قوسىلۋ مەن ءۇشىن ۇلكەن قۇرمەت»، — دەلىنگەن دونالد ترامپتىڭ قۇتتىقتاۋىندا.
مەملەكەت باسشىسى اقش پرەزيدەنتىنە جىلى لەبىزى ءۇشىن العىس ايتىپ، امەريكاندىق كوشباسشىنى قازاقستانعا رەسمي ساپارمەن كەلۋگە شاقىردى.
قاسىم-جومارت توقايەۆ كەڭەيتىلگەن قازاق-امەريكالىق ستراتەگيالىق ارىپتەستىكتىڭ قارقىندى دامىپ كەلە جاتقانىن اتاپ ءوتىپ، ءوزارا ءىس-قيمىلدى ودان ءارى نىعايتۋدىڭ ەرەكشە ماڭىزدىلىعىن اتاپ كورسەتتى.
«ءقازىر مەن ماياميدەگى G20 سامميتىنە قاتىسۋعا دايىندالىپ جاتىرمىن. بۇل ەكىجاقتى كۇن تارتىبىندەگى ماسەلەلەردى تالقىلاۋدىڭ دا جاقسى مۇمكىندىگى بولادى دەپ ويلايمىن. ءبىز ءوزارا ىنتىماقتاستىعىمىزدى ىلگەرىلەتۋ ءۇشىن ادەمى سوزدەردى ەمەس، ناقتى ىستەر مەن پراكتيكالىق قادامداردى قالايمىز»، — دەدى قازاقستان پرەزيدەنتى.
سەردجيو گور قازاقستان مەن اقش كوشباسشىلارى اراسىنداعى تىعىز ءارى سەنىمدى بايلانىستاردىڭ ارقاسىندا ەكىجاقتى قاتىناستار بۇرىن-سوڭدى بولماعان جوعارى دەڭگەيگە جەتكەنىن اتاپ ءوتتى.
«بۇگىندە ەلدەرىمىز اراسىنداعى ساۋدا-ەكونوميكالىق بايلانىستار مەن ءوزارا ءىس-قيمىل قارقىندى دامىپ كەلەدى. ءبىزدىڭ پرەزيدەنت قازاقستانمەن جانە ورتالىق ازيامەن ارىپتەستىكتى نىعايتۋعا ۇلكەن كوڭىل بولەدى»، — دەدى ارنايى وكىل.
كەزدەسۋ بارىسىندا جاساندى ينتەللەكت پەن سيفرلاندىرۋ سياقتى باسىم سالالارعا باسا نازار اۋدارا وتىرىپ، بىرلەسكەن جۇمىستىڭ ءبىرقاتار ماڭىزدى باعىتتارى قاراستىرىلدى.
اڭگىمە سوڭىندا تاراپتار كوپقىرلى ارىپتەستىكتى ودان ءارى كەڭەيتۋگە جانە ءوزارا ءتيىمدى ىنتىماقتاستىققا قوسىمشا سەرپىن بەرۋگە ۇمتىلاتىنىن راستادى.