قازاقستان پرەزيدەنتى قاسىم-جومارت توقايەۆ دۇنيەجۇزىلىك كەدەن ۇيىمىنىڭ باس حاتشىسى يەن سوندەرسپەن كەزدەسۋ وتكىزدى، دەپ حابارلايدى infohub.kz.
كەزدەسۋ بارىسىندا تاراپتار كەدەندىك اكىمشىلەندىرۋدى جەتىلدىرۋ، كەدەندىك راسىمدەرگە سيفرلىق تەحنولوگيالاردى ەنگىزۋ، سونداي-اق ورتالىق ازيانىڭ كولىك-لوگيستيكالىق الەۋەتىن نىعايتۋ ماسەلەلەرىن تالقىلادى.
قاسىم-جومارت توقايەۆ قازاقستان ەۋرازياداعى كولىك بايلانىستارىن نىعايتۋ جانە جۇك ءترانزيتى ءۇشىن قولايلى جاعدايلار جاساۋ جۇمىسىن جالعاستىرىپ جاتقانىن اتاپ ءوتتى. وسى باعىتتاعى نەگىزگى باسىمدىقتاردىڭ ءبىرى — «اقىلدى شەكارا» مودەلىن دامىتۋ. ونى ىسكە اسىرۋ ءۇشىن رەسپۋبليكا كەدەندىك وپەراسيالاردى وڭتايلاندىرۋعا جانە جەدەلدەتۋگە مۇمكىندىك بەرەتىن سيفرلىق شەشىمدەردى ەنگىزۋدە.
يەن سوندەرس قازاقستاننىڭ وسى سالاداعى جەتىستىكتەرىنە جوعارى باعا بەردى. ول زاماناۋي سيفرلىق تەحنولوگيالاردىڭ ەنگىزىلۋىن، كەدەندىك اكىمشىلەندىرۋدىڭ جاقسارعانىن جانە ءتيىستى ۆەدومستۆولاردىڭ ينستيتۋسيونالدىق الەۋەتىنىڭ ارتقانىن اتاپ ءوتتى.
تاراپتار قازاقستان مەن دۇنيەجۇزىلىك كەدەن ۇيىمى اراسىنداعى 30 جىلدان استام ۋاقىت بويى دامىپ كەلە جاتقان ىنتىماقتاستىقتى جالعاستىرۋ نيەتىن راستادى. سونىمەن قاتار، توقايەۆ پەن سوندەرس الەمدىك ساۋداداعى جاڭا ۇردىستەر مەن سىن-قاتەرلەر تۋرالى پىكىر الماستى. ساۋدا-ەكونوميكالىق بايلانىستاردى كەڭەيتۋ جانە ورتالىق ازيانىڭ كولىك-لوگيستيكالىق الەۋەتىن ودان ءارى دامىتۋ مۇمكىندىكتەرىنە ەرەكشە نازار اۋدارىلدى.