قازاقستان پرەزيدەنتى قاسىم-جومارت توقايەۆ گەرمانيا كانسلەرى فريدريح مەرسپەن كەلىسسوز جۇرگىزدى. تاراپتار ەكىجاقتى ىنتىماقتاستىقتى تالقىلاپ، ءوزارا ءىس-قيمىلدى جانداندىرۋعا ۋاعدالاستى، دەپ حابارلايدى infohub.kz سايتى.
مەملەكەت باسشىسى جىلى قابىلداعانى ءۇشىن العىس ايتتى. تاراپتار قازاقستان مەن گەرمانيا اراسىنداعى كوپقىرلى ىنتىماقتاستىقتى نىعايتۋعا بەرىك بەيىلدىلىكتەرىن راستاپ، ەكى ەل ۇكىمەتتەرى ءوزارا ءىس-قيمىلدى كەڭەيتۋگە جاعداي جاساۋ جولىندا جۇمىس ىستەيتىنىن اتاپ ءوتتى.
قازاقستان پرەزيدەنتى اتاپ وتكەندەي، گەرمانيا رەسپۋبليكانىڭ نەگىزگى ساۋدا سەرىكتەستەرىنىڭ جانە جەتەكشى شەتەلدىك ينۆەستورلارىنىڭ قاتارىندا. ونەركاسىپ، اسا ماڭىزدى مينەرالدار، كولىك جانە لوگيستيكا، سيفرلىق تەحنولوگيالار، سونداي-اق ماشينا جاساۋ مەن حيميا ونەركاسىبىن قوسا العاندا، قوسىلعان قۇنى جوعارى ءونىم شىعارۋ سياقتى سالالاردا ءوزارا ءىس-قيمىلدى ودان ءارى كەڭەيتۋدىڭ ايتارلىقتاي الەۋەتى بار.
سونىمەن قاتار كوپجاقتى ىنتىماقتاستىق ماسەلەلەرى بويىنشا جان-جاقتى پىكىر الماسۋ ءوتتى. حالىقارالىق قۇرىلىمدار، ونىڭ ىشىندە «ورتالىق ازيا — گەرمانيا» فورماتى اياسىندا ءوزارا ءىس-قيمىلدى جانداندىرۋعا ۋاعدالاستىققا قول جەتكىزىلدى.
ودان ءارى پرەزيدەنت پەن كانسلەر ەكى ەل دەلەگاسيالارىنىڭ مۇشەلەرى قاتىسقان كەلىسسوزدەردى جالعاستىردى. مەملەكەت باسشىسى قازاقستان مەن گەرمانيانىڭ ستراتەگيالىق سەرىكتەستىگى بەرىك ساياسي سەنىمگە، ءوزارا ەكونوميكالىق مۇددەلەرگە جانە تىعىز ادامي بايلانىستارعا سۇيەنەتىنىن اتاپ ءوتتى.
«وتكەن جىلى ءوزارا ساۋدا كولەمى 4،5 ملرد دوللارعا جەتىپ، 13،4%-عا ءوستى. 21 جىل ىشىندە گەرمانيادان كەلگەن ينۆەستيسيانىڭ جالپى اعىنى 8 ملرد دوللارعا جەتتى. گەرمانيالىق ينۆەستيسيالاردىڭ قاۋىپسىزدىگىن قامتاماسىز ەتۋ ءبىزدىڭ ەرەكشە باقىلاۋىمىزدا ەكەنىنە سەندىرگىم كەلەدى»، — دەدى قاسىم-جومارت توقايەۆ.
تاراپتار ساۋدا-ەكونوميكالىق ىنتىماقتاستىقتى نىعايتۋعا ەرەكشە نازار اۋداردى. اتاپ وتىلگەندەي، بۇگىنگى تاڭدا بىرلەسكەن ينۆەستيسيالىق پورتفەل جالپى قۇنى شامامەن 54 ملرد دوللاردى قۇرايتىن 40 ونەركاسىپتىك جوبانى قامتيدى. وسى ورايدا قازاقستان پرەزيدەنتى ۇكىمەتارالىق جۇمىس توبى مەن قازاقستان-گەرمانيا ىسكەرلىك كەڭەسىنىڭ جەمىستى ءارى ۇيلەسىمدى جۇمىسىن اتاپ ءوتتى.
مەملەكەت باسشىسى گەرمانيانىڭ قازىرگى الەمدىك ساياسات پەن ەكونوميكاداعى ماڭىزدى ءرولىن اتاپ كورسەتتى. ونىڭ ايتۋىنشا، ەلدىڭ ونەركاسىپتىك قۋاتى، عىلىمي مەكتەبى جانە نەمىس حالقىنىڭ جاۋاپكەرشىلىكپەن ەڭبەك ەتۋ مادەنيەتى حالىقارالىق دەڭگەيدە جوعارى بەدەلگە يە.
قازاقستان پرەزيدەنتى مەن گەرمانيا كانسلەرى ءبىلىم جانە عىلىم سالاسىنداعى بىرلەسكەن باستامالاردى ىسكە اسىرۋدى قوسا العاندا، مادەني-گۋمانيتارلىق ءوزارا ءىس-قيمىلدى كەڭەيتۋ ماسەلەلەرىن دە قاراستىردى. تاراپتار قاسىم-جومارت توقاەۆتىڭ گەرمانياعا رەسمي ساپارىنىڭ قورىتىندىلارى ەكى ەلدىڭ يگىلىگى مەن گۇلدەنۋى جولىندا ودان دا زور ناتيجەلەرگە قول جەتكىزۋگە ىقپال ەتەتىنىنە سەنىم ءبىلدىردى.
كەلىسسوزدەر قورىتىندىسى بويىنشا مەملەكەت باسشىسى كانسلەر فريدريح مەرستى قازاقستانعا مەملەكەتتىك ساپارمەن كەلۋگە شاقىردى.