قازاقستان پرەزيدەنتى قاسىم-جومارت توقايەۆ قاقتىعىستى مۇزداتىپ، «ستامبۋل فورمۋلاسى 2.0»-گە ورالۋدى ۇسىندى. بۇل مالىمدەمە كرەملدە دە، ۋكراينا سىرتقى ىستەر مينيسترلىگىندە دە نازار اۋدارتتى، دەپ حابارلايدى infohub.kz.
توقايەۆ بۇل پىكىرىن قازاقستان مەن رەسەيدىڭ ومبىدا وتكەن ءوڭىرارالىق ىنتىماقتاستىق فورۋمى اياسىندا رەسەي پرەزيدەنتى ۆلاديمير پۋتينمەن كەزدەسۋدە ايتتى. «ءسىز بىلەسىز، مەن باسىنان باستاپ بۇل مەملەكەتارالىق قاقتىعىس ەكەنىن ايتتىم. ەشقانداي ازاماتتىق سوعىس تۋرالى ءسوز جوق. ءبىز ۋكراين حالقىنا، ونىڭ مادەنيەتىنە، تىلىنە ءاردايىم قۇرمەتپەن قارادىق. جانە ءبىز بۇل قاقتىعىستىڭ تابيعاتى كوپشىلىككە، سونىڭ ىشىندە بىزگە دە تولىق تۇسىنىكتى ەمەس دەپ ەسەپتەيمىز. ءسىز الياسكاداعى انكوريدتەگى كەزدەسۋدە ديپلوماتيالىق يكەمدىلىكتىڭ ەڭ جوعارى دەڭگەيىن كورسەتتىڭىز. ال مەنىڭ قاراپايىم پىكىرىم، ويتكەنى ماعان جۇگىنەدى: مۇمكىن، بۇل قاقتىعىستى مۇزداتىپ، ستامبۋل فورمۋلاسى 2.0-گە ورالۋ كەرەك شىعار، ويتكەنى وندا ەلەۋلى ناتيجەلەرگە قول جەتكىزىلگەن ەدى. سودان كەيىن، ارينە، رەسەيدى قوسا العاندا، ۇلى دەرجاۆالاردىڭ كەپىلدىگىمەن كوپتەن كۇتكەن بەيبىتشىلىككە قاراي جىلجۋ كەرەك»، — دەدى قاسىم-جومارت توقايەۆ.
رەسەي پرەزيدەنتىنىڭ ءباسپاسوز حاتشىسى دميتري پەسكوۆ توقاەۆتىڭ ءسوزى توسىنسىي بولماعانىن ايتتى. «توقايەۆ ۋكراين ماسەلەسى بويىنشا بىرنەشە رەت سويلەگەن. ونىڭ ۇستانىمى دايەكتى. ءبىز كەلىسەمىز دەگەندى بىلدىرمەيدى. ءبىراق قازاقستان — ءبىزدىڭ ەڭ جاقىن سەرىكتەسىمىز، ەڭ جاقىن وداقتاسىمىز»، — دەپ اتاپ ءوتتى ول. سونىمەن قاتار پەسكوۆ رەسەي قاقتىعىس بويىنشا ءوز ۇستانىمىن ءتۇسىندىرۋدى جالعاستىراتىنىن قوستى.
ۋكراينا سىرتقى ىستەر ءمينيسترى اندرەي سيبيگا قازاقستان پرەزيدەنتىن ۋكرايناداعى سوعىستى توقتاتۋعا شاقىرعانى ءۇشىن العىس ءبىلدىرىپ، بۇل مالىمدەمەنى «رەاليستىك، ۋاقىتىلى جانە دانا سيگنال» دەپ اتادى. «پرەزيدەنت قاسىم-جومارت توقاەۆتىڭ پۋتينگە سوعىستى توقتاتۋ ۋاقىتى كەلدى دەگەن ۇندەۋىن باعالايمىز. رەاليستىك، ۋاقىتىلى جانە دانا ۇندەۋ. ۋكراينا قازىرگى مايدان شەبى بويىنشا ۇرىس قيمىلدارىن توقتاتىپ، ديپلوماتيالىق رەتتەۋگە كوشۋدى ۇسىندى، ءبىراق كرەمل بەيبىتشىلىكتىڭ بۇل ايقىن جولىنان باس تارتىپ كەلەدى»، — دەپ جازدى ول الەۋمەتتىك جەلىدە.