قازاقستان پرەزيدەنتى قاسىم-جومارت توقايەۆ قاۋىپسىزدىك كەڭەسى مەن ونىڭ اپپاراتىنىڭ وكىلەتتىگىن قايتا بەلگىلەدى: ەندى قاۋىپسىزدىك كەڭەسى ەلدى كيبەرشابۋىلداردان قورعاپ، جاساندى ينتەللەكتىنى رەتتەپ، جەكە دەرەكتەردىڭ تارالۋىنا توسقاۋىل قوياتىن بولادى، دەپ حابارلايدى infohub.kz سايتى.
ءتيىستى وزگەرىستەر «ق ر قاۋىپسىزدىك كەڭەسى اپپاراتىنىڭ كەيبىر ماسەلەلەرى جانە ق ر پرەزيدەنتىنىڭ كەيبىر اكتىلەرىنە وزگەرىستەر مەن تولىقتىرۋلار ەنگىزۋ تۋرالى» جارلىقپەن بەكىتىلدى. مەملەكەت باسشىسى قاۋىپسىزدىك كەڭەسى ءتوراعاسىنىڭ ورىنباسارىنىڭ مىندەتتەر اياسىن ايقىندادى.
ونىڭ مىندەتتەرىنە مىنالار كىرەدى: قاۋىپسىزدىك كەڭەسى ءتوراعاسىنىڭ اكتىلەرى مەن تاپسىرمالارىنىڭ، سونداي-اق ۇيىم شەشىمدەرىنىڭ ءسوزسىز جانە تولىق ورىندالۋىن باقىلاۋدى ۇيىمداستىرۋ؛ مەملەكەتتىك ورگانداردىڭ قىزمەتىن ۇيلەستىرۋ؛ ۇلتتىق قاۋىپسىزدىك، قورعانىس قابىلەتى، زاڭدىلىق پەن قۇقىق ءتارتىبى سالاسىنداعى ءىس-شارالاردى ۇيىمداستىرۋ؛ قاۋىپسىزدىك كەڭەسى اپپاراتىنىڭ جۇمىسىن ۇيلەستىرۋ.
سونىمەن قاتار كەڭەس ءتوراعاسىنىڭ ورىنباسارى اقپاراتتىق جانە كيبەرقاۋىپسىزدىك، جاساندى ينتەللەكتىنى پايدالانۋ، جەكە دەرەكتەردى قورعاۋ، سىبايلاس جەمقورلىق پەن ەكونوميكالىق قىلمىسقا قارسى ءىس-قيمىل، سونداي-اق ازاماتتىق قورعانىس ماسەلەلەرىمەن اينالىسادى.
پرەزيدەنت قاۋىپسىزدىك كەڭەسى اپپاراتىنىڭ قىزمەتىن دە ناقتىلادى. ول مەملەكەت باسشىسىنا باعىناتىن دەربەس ورگان رەتىندە كورسەتىلگەن.
«قاۋىپسىزدىك كەڭەسى اپپاراتىنىڭ قىزمەتى ۇلتتىق قاۋىپسىزدىك سالاسىنداعى تاۋەكەلدەردى باقىلاۋدى كۇشەيتۋ مەن جەتىلدىرۋگە، مەملەكەتتىك باسقارۋدىڭ تۇراقتىلىعىن قامتاماسىز ەتۋگە، ينستيتۋسيونالدىق قولداۋعا جانە كەڭەس ءتوراعاسى مەن قاۋىپسىزدىك كەڭەسىنىڭ شەشىمدەرىن ورىنداۋعا باعىتتالعان»، — دەلىنگەن قۇجاتتا.
توقاەۆتىڭ پىكىرىنشە، وسى مىندەتتەردى جۇزەگە اسىرۋ ەگەمەندىك پەن تاۋەلسىزدىكتى، اۋماقتىق تۇتاستىقتى، حالىقارالىق ارەناداعى ۇلتتىق مۇددەلەردى جانە كونستيتۋسيالىق قۇرىلىس نەگىزدەرىن قورعاۋدى كۇشەيتۋگە ىقپال ەتەدى.
بۇعان دەيىن «كۋرسيۆ» قازاقستاننىڭ قاۋىپسىزدىك كەڭەسى اپپاراتىندا كادرلىق تاعايىنداۋلار بولعانىن جازعان ەدى.