قازاقستان پرەزيدەنتى قاسىم-جومارت توقايەۆ قازاقستان رەسپۋبليكاسى كونستيتۋسيالىق سوتىنىڭ سۋدياسى باقىت مارات ۇلى نۇرمۇحانوۆتى كونستيتۋسيالىق سوت ءتوراعاسىنىڭ ورىنباسارى قىزمەتىنە تاعايىنداۋ تۋرالى جارلىققا قول قويدى. بۇل تۋرالى infohub.kz سايتى حابارلايدى.
«مەملەكەت باسشىسىنىڭ جارلىعىمەن ق ر كونستيتۋسيالىق سوتىنىڭ سۋدياسى نۇرمۇحانوۆ باقىت مارات ۇلى قازاقستان رەسپۋبليكاسى كونستيتۋسيالىق سوتى ءتوراعاسىنىڭ ورىنباسارى بولىپ تاعايىندالدى»، — دەلىنگەن اقوردا حابارلاماسىندا.
كونستيتۋسيالىق سوتتىڭ دەرەكتەرىنە سايكەس، باقىت نۇرمۇحانوۆ 1979 جىلى 13 مامىردا دۇنيەگە كەلگەن. ول شىعىس قازاقستان مەملەكەتتىك ۋنيۆەرسيتەتىن «قۇقىقتانۋ» ماماندىعى بويىنشا بىتىرگەن.
ەڭبەك جولىن شىعىس قازاقستان مەملەكەتتىك ۋنيۆەرسيتەتى زاڭ فاكۋلتەتىنىڭ قىلمىستىق قۇقىق جانە قىلمىستىق پروسەسس كافەدراسىنىڭ وقىتۋشىسى بولىپ باستادى.
2003–2006 جىلدارى قازاقستان رەسپۋبليكاسى كونستيتۋسيالىق كەڭەسى اپپاراتىنىڭ قۇقىقتىق ساراپتاما بولىمىندە قۇقىقتىق ءبولىمنىڭ كەڭەسشىسى، قۇقىقتىق قامتاماسىز ەتۋ ءبولىمىنىڭ باس ساراپشىسى، باس ساراپشى، باس كەڭەسشى، سونداي-اق تالداۋ جۇمىسى سەكتورىنىڭ مەڭگەرۋشىسى قىزمەتتەرىن اتقاردى.
سونىمەن قاتار كونستيتۋسيالىق كەڭەس ءتوراعاسىنىڭ كەڭەسشىسى (2006–2011)، قۇقىقتىق ساراپتاما ءبولىمىنىڭ مەڭگەرۋشىسى (2011–2017) جانە كونستيتۋسيالىق كەڭەس اپپاراتىنىڭ جەتەكشىسى (2017–2022) لاۋازىمدارىندا بولدى.
2008–2022 جىلدارى ەۋروپا كەڭەسىنىڭ قۇقىق ارقىلى دەموكراتيا جونىندەگى ەۋروپالىق كوميسسياسىنىڭ (ۆەنەسيا كوميسسياسى) بايلانىس جونىندەگى وفيسەرى قىزمەتىن قوسا اتقاردى. كونستيتۋسيالىق سوتتىڭ سۋدياسى بولىپ 2023 جىلعى 1 قاڭتاردان باستاپ تاعايىندالعان.
ەسكە سالايىق، 18 قىركۇيەكتە ەلۆيرا ءازىموۆا كونستيتۋسيالىق سوت ءتوراعاسى بولىپ قايتا تاعايىندالعان بولاتىن — ءتيىستى جارلىققا پرەزيدەنت قول قويعان.