قازاقستان پرەزيدەنتى قاسىم-جومارت توقايەۆ كورەيا رەسپۋبليكاسىنىڭ پرەمەر-مينيسترى حان سون سۋكپەن كەزدەسىپ، ونى جاقىندا تاعايىندالۋىمەن قۇتتىقتاپ، جاڭا قىزمەتىندە تابىس تىلەدى، دەپ حابارلايدى infohub.kz سايتى.
مەملەكەت باسشىسى ەكى ەل اراسىنداعى قارىم-قاتىناستىڭ ستراتەگيالىق ارىپتەستىك اياسىندا دامىپ كەلە جاتقانىن اتاپ ءوتتى.
«قازاق-كورەي قاتىناستارى قازىرگى تاڭدا تۇراقتى دامىپ كەلەدى. ستراتەگيالىق ارىپتەستىگىمىز اياسىندا ءوزارا ءتيىمدى نەگىزدە كوپتەگەن ماڭىزدى باستاما جۇزەگە اسىرىلۋدا. سىزدەردىڭ ەلىڭىز قازاقستاننىڭ جەتەكشى ساۋدا جانە ينۆەستيسيالىق ارىپتەستەرىنىڭ وندىعىنا كىرەدى. ەلىمىزدە كورەي كاپيتالى قاتىسقان مىڭنان استام بىرلەسكەن كاسىپورىن جۇمىس ىستەيدى. الايدا الدا ءالى دە جاۋاپتى مىندەتتەر تۇر. سوندىقتان ءبىر كوماندا رەتىندە بىرلەسكەن كۇش-جىگەرمەن بارلىق جوسپارلانعان جوسپاردى ءساتتى جۇزەگە اسىراتىنىمىزعا سەنىمدىمىن»، – دەدى پرەزيدەنت.
توقاەۆتىڭ ايتۋىنشا، قازاقستان وڭتۇستىك كورەيامەن ىنتىماقتاستىقتى ودان ءارى كەڭەيتۋگە مۇددەلى.
مەملەكەت باسشىسى ەلىمىزدە قولايلى ىسكەرلىك جانە ينۆەستيسيالىق احۋال قالىپتاسقانىن دا اتاپ ءوتتى.
«ءىرى كورەي كورپوراسيالارىمەن قاتار، شاعىن جانە ورتا كاسىپورىندار ءۇشىن دە بيزنەس جۇرگىزۋگە قولايلى جاعداي جاسالدى. قازاقستان مەن كورەيا ۇكىمەتتەرى وسى باعىتتا قاجەتتى شارالار قولدانىپ كەلەدى. اتاپ ايتقاندا، ساۋدا-ەكونوميكالىق جانە عىلىمي-تەحنيكالىق ىنتىماقتاستىق جونىندەگى ۇكىمەتارالىق كوميسسيا مەن ىسكەرلىك كەڭەس ءتيىمدى جۇمىس ىستەپ تۇر. سونىمەن قاتار قاجەتتى قۇقىقتىق بازا قۇرىلدى»، – دەدى قاسىم-جومارت توقايەۆ.
پرەزيدەنت ەكى ەل اراسىنداعى قولدانىستاعى ىنتىماقتاستىق تەتىكتەرىنىڭ بىرلەسكەن جوبالاردى جۇزەگە اسىرۋداعى ءرولىن اتاپ ءوتتى.
بۇعان دەيىن وڭتۇستىك كورەيا قازاقستانداعى اۋەجايلاردى سالىپ، جاڭارتا الاتىنى حابارلانعان. سونداي-اق Lotte Group الماتىدا ءوز برەندىمەن العاشقى ءقوناقۇي سالىپ، Alatau City دامۋىنا قاتىساتىنى بەلگىلى بولدى. كومپانيا قازاقستاننىڭ تاماق ونەركاسىبى مەن لوگيستيكاسىندا دا جۇمىسىن جالعاستىرادى.