قازاقستان پرەزيدەنتى قاسىم-جومارت توقايەۆ جوعارى اۋديتورلىق پالاتانىڭ ءتوراعاسى اليحان سمايىلوۆپەن كەزدەسىپ، وعان قورعانىس مينيسترلىگىندە بيۋدجەت قاراجاتىن پايدالانۋ تيىمدىلىگىنە جۇرگىزىلىپ جاتقان جوسپاردان تىس ءاۋديتتىڭ بارىسى تۋرالى ەسەپ ۇسىنىلدى. بۇل تۋرالى infohub.kz سايتى حابارلايدى.
مەملەكەت باسشىسىنىڭ ءباسپاسوز قىزمەتىنىڭ مالىمەتىنشە، اۋقىمدى تەكسەرىس 50 نىساندى، ونىڭ ىشىندە 48 اسكەري ءبولىمدى قامتيدى. ونى جۇرگىزۋ ءۇشىن مەملەكەتتىك اۋديت جۇيەسىنىڭ جەتەكشى ماماندارىنان، سونداي-اق اقپاراتتىق تەحنولوگيالار جانە بايلانىس سالاسىنىڭ ساراپشىلارىنان توپ قۇرىلعان.
«اۋديت اياسىندا قارۋلى كۇشتەر قىزمەتىنىڭ بارلىق نەگىزگى باعىتتارى بويىنشا ءىستىڭ جاي-كۇيىنە باعا بەرىلەدى. اتاپ ايتقاندا، اسكەري بولىمشەلەردى ماتەريالدىق-تەحنيكالىق قامتاماسىز ەتۋ، جەكە قۇرامدى دايارلاۋ، اسكەري جاتتىعۋلار وتكىزۋ، اسكەري ينفراقۇرىلىمدى دامىتۋ، قارۋ-جاراق پەن تەحنيكانى جاڭعىرتۋ، سيفرلىق جۇيەلەردىڭ جۇمىس قابىلەتى»، — دەلىنگەن حابارلامادا.
سونىمەن قاتار پرەزيدەنتكە اياقتالعان مەملەكەتتىك قورعانىس تاپسىرىسى ءاۋديتىنىڭ ناتيجەلەرى باياندالدى. ونىڭ قورىتىندىسى بويىنشا جوعارى اۋديتورلىق پالاتا ۇكىمەتكە جانە بەيىندى مەملەكەتتىك ورگاندارعا انىقتالعان بۇزۋشىلىقتاردى جويۋ ءۇشىن 57 ناقتى ۇسىنىم مەن تاپسىرما جولدادى.
توقاەۆقا سونداي-اق ەكونوميكالىق دامۋ مەن الەۋمەتتىك سالانىڭ باسىم باعىتتارىن قامتيتىن جوسپارلى اۋديتورلىق تەكسەرىستەردىڭ بارىسى تۋرالى بايانداما ۇسىنىلدى.
اليحان سمايىلوۆ استانادا وتكەن ازيانىڭ جوعارى اۋديت ورگاندارى ۇيىمى باسقارما كەڭەسىنىڭ 63ء-شى وتىرىسىنىڭ قورىتىندىلارى تۋرالى دا ايتتى. وعان ايماقتىڭ 19 ەلىنىڭ وكىلدەرى قاتىستى. مۇنداي فورماتتاعى ءىس-شارا قازاقستاندا العاش رەت وتكىزىلدى.
«كەزدەسۋ قورىتىندىسى بويىنشا پرەزيدەنت قورعانىس مينيسترلىگىنە اۋديت جۇرگىزۋ جانە مەملەكەتتىك ءاۋديتتىڭ بۇكىل جۇيەسىن ودان ءارى دامىتۋ جونىندە ءبىرقاتار ناقتى مىندەتتەر قويدى»، — دەپ قوستى اقوردادا.
ەسكە سالايىق، ماڭعىستاۋ وبلىسىندا اسكەري قىزمەتشىلەردىڭ قازا تابۋىنان كەيىن قاسىم-جومارت توقايەۆ قازاقستان قورعانىس مينيسترلىگىندەگى ءىستىڭ جاي-كۇيىن كەشەندى تەكسەرۋ جونىندەگى كوميسسيا قۇرۋ تۋرالى وكىمگە قول قويعان بولاتىن. ودان كەيىن قازاقستان رەسپۋبليكاسىنىڭ جوعارى اۋديتورلىق پالاتاسى قورعانىس مينيسترلىگىنە مەملەكەتتىك اۋديت جۇرگىزۋگە كىرىستى.
تراگەديا 24 قىركۇيەكتە وقۋ-جاۋىنگەرلىك مىندەتتى ورىنداۋ بارىسىندا بولدى — اۋا رايىنىڭ كەنەتتەن جانە كۇرت ناشارلاۋى مەن ەكپىندى جەلدىڭ سالدارىنان كاسپي تەڭىزىنە 17 اسكەري قىزمەتشىنى اعىزىپ اكەتتى، ولاردىڭ 14ء-ى قازا تاپتى.