استانادا قازاقستان پرەزيدەنتى قاسىم-جومارت توقايەۆ پەن لاوس پرەزيدەنتى تحونگلۋن سيسۋليت كەزدەسۋ وتكىزدى. تاراپتار تار قۇرامدا ەكىجاقتى ىنتىماقتاستىق ماسەلەلەرىن تالقىلادى، دەپ حابارلايدى infohub.kz.
قاسىم-جومارت توقايەۆ قۇرمەتتى قوناقتى قارسى الىپ، لاوس باسشىسىنىڭ قازاقستانعا العاشقى ساپارىن تاريحي وقيعا دەپ اتادى. ول بيىل ەلدەر اراسىندا ديپلوماتيالىق قاتىناس ورناعانىنا 30 جىل تولاتىنىن ايتىپ، بايلانىستاردىڭ دوستىق سيپاتىن اتاپ ءوتتى.
«ءبىز حالىقارالىق ارەنادا، ەڭ الدىمەن، بىرىككەن ۇلتتار ۇيىمى اياسىندا تىعىز ىنتىماقتاسامىز. سونىمەن قاتار، لاوس تاراپىنىڭ ءوااش اياسىنداعى باستامالارىمىزدى قولداعانى ءۇشىن شىنايى العىسىمدى بىلدىرگىم كەلەدى. مىرزا پرەزيدەنت، بۇل ءسىزدىڭ ەلىمىزگە العاشقى ساپارىڭىز. وسى ساپار اياقتالعاننان كەيىن ۇكىمەتتەرىمىز قول جەتكىزىلگەن ۋاعدالاستىقتاردى بەلسەندى تۇردە جۇزەگە اسىرا باستايدى دەپ سەنەمىن»، — دەدى قاسىم-جومارت توقايەۆ.
قازاقستان پرەزيدەنتىنىڭ ايتۋىنشا، لاوس — وڭتۇستىك-شىعىس ازياداعى ماڭىزدى ءارى سەنىمدى سەرىكتەس. ول سونداي-اق لاوس ەكونوميكاسىنىڭ سوڭعى جىلدارى، اسىرەسە ەنەرگەتيكا، اۋىل شارۋاشىلىعى، ونەركاسىپ جانە تۋريزم سالالارىندا تۇراقتى ءوسىپ كەلە جاتقانىن اتاپ ءوتتى.
ءوز كەزەگىندە تحونگلۋن سيسۋليت قازاقستانعا ساپارعا شاقىرعانى ءۇشىن العىس ءبىلدىردى. ول: «وسى ساپار بارىسىندا مەن قازاقستاننىڭ قانشالىقتى جان-جاقتى دامىپ جاتقانىن، ءسىزدىڭ باسشىلىعىڭىزبەن قانداي اۋقىمدى رەفورمالار جۇرگىزىلىپ جاتقانىن ءوز كوزىممەن كوردىم. مەن ءۇشىن ەل پرەزيدەنتى رەتىندە قازاقستانعا بۇل رەسمي ساپاردى جاساپ، بۇگىن سىزبەن كەزدەسۋ ۇلكەن مارتەبە. مەنىڭ ساپارىم ەكىجاقتى قارىم-قاتىناستاردى نىعايتۋعا ەلەۋلى ۇلەس قوسادى دەپ شىن جۇرەكتەن سەنەمىن. كەلىسسوزدەر بارىسىندا ءبىز كەڭ اۋقىمدى ماسەلەلەردى تالقىلاپ، ىنتىماقتاستىق پەن بىرلەسكەن جۇمىستىڭ پەرسپەكتيۆالى باعىتتارىن ايقىنداي الامىز دەپ سەنەمىن»، — دەدى.