قازاقستان پرەزيدەنتى قاسىم-جومارت توقايەۆ ماڭعىستاۋ وبلىسىنداعى اسكەري وقۋ-جاتتىعۋ كەزىندە بولعان قايعىلى وقيعا سالدارىنان قازا تاپقان اسكەري قىزمەتشىلەردىڭ تۋعان-تۋىستارىنا قايعىرا كوڭىل ايتىپ، اتالعان جاعدايدى تەرگەۋ جونىندە تاپسىرمالار بەردى، دەپ حابارلايدى infohub.kz سايتى.
اقوردانىڭ Telegram-ارناسىندا ءمالىم بولعانداي، مەملەكەت باسشىسى ۇكىمەتتىك كوميسسياعا بولعان وقيعانىڭ ءمان-جايىن انىقتاۋ جانە قازا تاپقانداردىڭ وتباسىلارىنا كومەك كورسەتۋ ءۇشىن بارلىق قاجەتتى شارالاردى قولدانۋدى تاپسىردى.
قايعىلى وقيعا بۇگىن، 24 قىركۇيەكتە ماڭعىستاۋ وبلىسىندا بولدى. قازاقستان رەسپۋبليكاسى قارۋلى كۇشتەرىنىڭ اسكەري-تەڭىز كۇشتەرى وقۋ-جاۋىنگەرلىك مىندەتتەرىن ورىنداۋ بارىسىندا كاسپي تەڭىزىنىڭ جاعالاۋىندا اۋا رايىنىڭ كۇرت ناشارلاۋى مەن جەلدىڭ كۇشەيۋىنە بايلانىستى اسكەري قىزمەتشىلەردى تەڭىزگە اعىزىپ اكەتتى.
قورعانىس مينيسترلىگىنىڭ الدىن الا مالىمەتىنشە، تەڭىزگە 19 اسكەري قىزمەتشى اعىزىلىپ كەتكەن. قازىرگى تاڭدا 9 اسكەري قىزمەتشىنىڭ قازا تاپقانى تىركەلدى.
باس پروكۋراتۋرا اقتاۋ گارنيزونىنداعى وقۋ-جاتتىعۋ كەزىندە اسكەري قىزمەتشىلەردىڭ قازا تابۋ فاكتىسى بويىنشا قىلمىستىق ءىس قوزعالىپ، تەرگەلىپ جاتقانىن حابارلادى.
اقتاۋلىق بلوگەر ازامات سارسەنبايەۆ ماڭعىستاۋ وبلىسىنداعى توتەنشە جاعداي ورنىنان بەينەجازبا جاريالادى.
اسكەري قىزمەتشىلەر قازا تاپقاننان كەيىن ۇكىمەتتىك كوميسسيا قۇرىلىپ، وقيعا ورنىنا پرەمەر-مينيستردىڭ ورىنباسارى قانات بوزىمبايەۆ جىبەرىلدى.