قازاقستان پرەزيدەنتى قاسىم-جومارت توقايەۆ نيۋ-دەليدە وتكەن بريكس ءسامميتى اياسىندا ءۇندىستان پرەمەر-مينيسترى نارەندرا موديمەن كەزدەستى، دەپ حابارلايدى infohub.kz سايتى.

مەملەكەت باسشىسى ءۇندىستان پرەمەر-مينيسترىن بريكس ءسامميتىنىڭ ءساتتى وتۋىمەن قۇتتىقتاپ، اۋقىمدى حالىقارالىق شارانىڭ ءمىنسىز ۇيىمداستىرىلعانىن اتاپ ءوتتى.

قاسىم-جومارت توقايەۆ ءۇندىستاننىڭ الەمدىك ەكونوميكاداعى جەتەكشى ورنىن، عىلىمي-تەحنيكالىق سالاداعى كورنەكتى جەتىستىكتەرىن جانە حالىقارالىق ارەناداعى جوعارى بەدەلىن ايتتى.

«ءسىزدىڭ دانا ءارى مىقتى باسشىلىعىڭىزبەن ەل پروگرەسس پەن تۇراقتى دامۋ جولىندا سەنىمدى تۇردە العا جىلجۋدا»، — دەدى پرەزيدەنت.

مەملەكەت باسشىسى ءقازاق-ۇندى قاتىناستارى كەڭ اۋقىمدى باعىتتار بويىنشا قارقىندى دامىپ كەلە جاتقانىن اتاپ ءوتتى.

«بۇگىندە قازاقستاندا ءۇندى كاپيتالى قاتىسقان 600-گە جۋىق كومپانيا تابىستى جۇمىس ىستەپ جاتىر. وتكەن جىلى ەلىمىزگە ءۇندىستاننىڭ 150 مىڭعا جۋىق ازاماتى كەلدى. قازاقستاندا ءۇندى ستۋدەنتتەرىنىڭ ەداۋىر بولىگى ءبىلىم الۋدا. سونداي-اق حالىقارالىق ۇيىمدار اياسىندا جەمىستى ىنتىماقتاسىپ كەلەمىز»، — دەدى قاسىم-جومارت توقايەۆ.

نارەندرا مودي مەملەكەت باسشىسىنا بريكس سامميتىنە قاتىسقانى ءۇشىن العىس ايتىپ، قازاقستان پرەزيدەنتىنىڭ جىگەرلەندىرەتىن جانە وزەكتى باستامالارعا تولى ءسوز سويلەگەنىن اتاپ ءوتتى.

ءۇندىستان پرەمەر-مينيسترى قازاقستانمەن دوستىق جانە سەنىمدى قارىم-قاتىناسقا ەرەكشە ءمان بەرەتىنىن اتاپ ءوتتى.

اڭگىمەلەسۋ بارىسىندا تاراپتار ەكىجاقتى كۇن تارتىبىندەگى ءبىرقاتار ناقتى ماسەلەلەردى، ونىڭ ىشىندە ەنەرگەتيكا، سيفرلاندىرۋ، ءبىلىم جانە تۋريزم سالالارىنداعى ىنتىماقتاستىقتى تالقىلادى.

نارەندرا ءموديدىڭ ايتۋىنشا، قازاقستان مەن ءۇندىستان جوعارى تەحنولوگيالار مەن كرەاتيۆتى يندۋستريالار سالاسىندا ايتارلىقتاي الەۋەتكە يە. وسىعان بايلانىستى استانانىڭ (Astana Hub) جانە حايدارابادتىڭ (Cyberabad) تەحنولوگيالىق ەكوجۇيەلەرى اراسىنداعى ءوزارا ءىس-قيمىل وتە پەرسپەكتيۆالى بولىپ كورىنەدى.

ءۇندىستان پرەمەر-مينيسترى قازاقستان وكىلدەرىن، اسىرەسە جاستاردى، كەلەسى جىلى مۋمبايدا وتەتىن WAVES كرەاتيۆتى يندۋستريالار سامميتىنە قاتىسۋعا شاقىردى.

كەزدەسۋ بارىسىندا كوشباسشىلار ءۇندىستان مەن ەۋرازيالىق ەكونوميكالىق وداق اراسىنداعى ىنتىماقتاستىقتى دامىتۋ مۇمكىندىكتەرىن دە قاراستىردى.

قاسىم-جومارت توقايەۆ قازاقستان ەاەو ءتوراعاسى رەتىندە ەاەو مەن ءۇندىستان اراسىندا ەركىن ساۋدا ايماعىن قۇرۋ جونىندەگى كەلىسسوز پروسەسىن قولدايتىنىن جانە ونى ىلگەرىلەتۋگە دايىن ەكەنىن مالىمدەدى.

مەملەكەت باسشىسى ءۇندىستان پرەمەر-مينيسترىن قازاقستانعا مەملەكەتتىك ساپارمەن كەلۋگە شاقىردى.