قازاقستان پرەزيدەنتى قاسىم-جومارت توقايەۆ ەربول مىرزابوسىنوۆتى تۋريزم جانە سپورت ءمينيسترى قىزمەتىنە قايتا تاعايىنداۋ تۋرالى جارلىققا قول قويدى، دەپ حابارلايدى infohub.kz سايتى.
اقوردانىڭ رەسمي حابارلاماسىندا ايتىلعانداي، ەربول قۋانتاي ۇلى مىرزابوسىنوۆ ەلدىڭ تۋريزم سالاسى مەن سپورت سالاسىنىڭ دامۋىنا جاۋاپتى ۆەدومستۆونى باسقارا بەرەدى.
پرەمەر-مينيستردىڭ سايتىندا جاريالانعان ءومىرباياندىق دەرەكتەرگە سايكەس، ەربول مىرزابوسىنوۆ 1984 جىلى شىعىس قازاقستان وبلىسىندا دۇنيەگە كەلگەن. ول سەمەي مەملەكەتتىك پەداگوگيكالىق ينستيتۋتىن، قازاق گۋمانيتارلىق-زاڭ يننوۆاسيالىق ۋنيۆەرسيتەتىن، سونداي-اق قازاق سپورت جانە تۋريزم اكادەمياسىن بىتىرگەن.
جاڭا-ەسكى ءمينيستردىڭ ەڭبەك جولى 2005 جىلى سەمەي مەملەكەتتىك پەداگوگيكالىق ينستيتۋتىنىڭ دەنە شىنىقتىرۋ جانە سپورت تەورياسى مەن ادىستەمەسى كافەدراسىنىڭ اسسيستەنتى جانە جاتتىقتىرۋشى-وقىتۋشىسى بولىپ باستالعان.
2009-2014 جىلدار ارالىعىندا ول سەمەيدەگى مەملەكەتتىك مەديسينا ۋنيۆەرسيتەتىندە دەنە تاربيەسى كافەدراسىنىڭ وقىتۋشىسى، كەيىن دەنە تاربيەسى كافەدراسىنىڭ مەڭگەرۋشىسى بولىپ جۇمىس ىستەدى. سونىمەن قاتار، 2006-2018 جىلدارى مىرزابوسىنوۆ «شىعىس قازاقستان وبلىستىق جاپپاي سپورت تۇرلەرى بويىنشا جوعارى سپورت شەبەرلىگى مەكتەبى» كمم-دە جاتتىقتىرۋشى-وقىتۋشى بولدى.
2018-2020 جىلدارى ول « قىزىلجار ارلاندارى» سپورت كلۋبىن باسقارسا، 2020-2021 جىلدارى «Qazaq kuresi» قاۋىمداستىعىنىڭ باسقارۋشى ديرەكتورى قىزمەتىن اتقاردى. 2021 جىلدىڭ ناۋرىزىنان 2023 جىلدىڭ اقپانىنا دەيىن مىرزابوسىنوۆ دەنە شىنىقتىرۋ جانە جاپپاي سپورت اكادەمياسىنىڭ رەكتورى بولدى.
سوڭعى تاعايىنداۋعا دەيىن ول ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى قىزمەتىن اتقارعان.