قازاقستان پرەزيدەنتى قاسىم-جومارت توقايەۆ بۇگىن ەلگە مەملەكەتتىك ساپارمەن كەلگەن ومان سۇلتانى حايسام بەن تاريق ءال-سايدتى ەلوردا اۋەجايىندا قارسى الدى، دەپ حابارلايدى infohub.kz سايتى.
اقوردانىڭ مالىمەتىنشە، قازاقستان شەكاراسىنان وتكەن ساتتەن باستاپ ەلوردا اۋەجايىنا كەلگەنگە دەيىن ومان سۇلتانىنىڭ ۇشاعىن قازاقستان اسكەري-اۋە كۇشتەرىنىڭ يسترەبيتەلدەرى الىپ ءجۇردى. ۇشۋ الاڭىندا قۇرمەتتى قاراۋىل مەن پرەزيدەنتتىك وركەستر ساپقا تۇرعىزىلدى.
اقوردانىڭ اقپاراتى بويىنشا، اۋەجايدىڭ كەلۋ زالىندا ەكى مەملەكەت باسشىلارى اراسىندا قىسقاشا اڭگىمە بولدى. قاسىم-جومارت توقايەۆ ومان سۇلتانىنىڭ ساپارىن قۇپتاي وتىرىپ، ونىڭ ەكىجاقتى قاتىناستاردى دامىتۋداعى تاريحي ماڭىزىن اتاپ ءوتتى.
«ومان ەكونوميكالىق دامۋدا ايتارلىقتاي جەتىستىكتەرگە جەتكەن تابىستى مەملەكەت رەتىندە، سونداي-اق حالىقارالىق دەلدال رەتىندە وتە بەلسەندى جانە سىندارلى ءرول اتقاراتىن ەل رەتىندە كەڭىنەن تانىمال. ءسىزدىڭ ەلىڭىز ءوز ايماعىندا عانا ەمەس، ونىڭ شەگىنەن تىس جەرلەردە دە، سونىڭ ىشىندە قازاقستاندا دا لايىقتى بەدەلگە يە. ءبىزدىڭ ەلدەر اراسىنداعى سەرىكتەستىكتىڭ مول الەۋەتى بار ەكەنىنە سەنىمدىمىن، ونى تولىق اشۋ جانە ءتيىمدى ىسكە اسىرۋ قاجەت»، — دەدى قازاقستان پرەزيدەنتى.
ومان سۇلتانى حايسام بەن تاريق ءال-سايد قاسىم-جومارت توقاەۆقا جىلى قابىلداعانى ءۇشىن العىس ايتىپ، الداعى كەلىسسوزدەر مازمۇندى ءارى تابىستى بولاتىنىنا سەنىم ءبىلدىردى.
ساپار باعدارلاماسىندا جوعارى دەڭگەيدەگى كەلىسسوزدەر، ءبىرقاتار ماڭىزدى قۇجاتتارعا قول قويۋ، سونداي-اق مەملەكەت باسشىلارىنىڭ قازاق-ومان بيزنەس-فورۋمىنا قاتىسۋى قاراستىرىلعان.
بۇعان دەيىن 5–6 قازاندا قازاقستان پرەزيدەنتى قاسىم-جومارت توقاەۆتىڭ شاقىرۋىمەن ومان سۇلتانى حايسام بەن تاريق ءال-سايدتىڭ مەملەكەتتىك ساپارمەن كەلەتىنى حابارلانعان بولاتىن.
مەملەكەتتىك كۇزەت قىزمەتى استانادا ءبىرقاتار حالىقارالىق ساياسي ءىس-شارالار وتكىزىلۋىنە بايلانىستى 5–6 قازاندا ەلوردا كوشەلەرىنىڭ كەيبىر ۋچاسكەلەرىندە كولىك قوزعالىسىنا ۋاقىتشا شەكتەۋلەر ەنگىزىلەتىنىن ەسكەرتكەن ەدى.