قازاقستان پرەزيدەنتى قاسىم-جومارت توقايەۆ كورەيا رەسپۋبليكاسىنا مەملەكەتتىك ساپارى بارىسىندا وسى ەلدە وقىپ، ەڭبەك ەتىپ جۇرگەن وتانداستارىمىزبەن كەزدەستى، دەپ حابارلايدى infohub.kz سايتى.
مەملەكەت باسشىسى قازاقستاندىقتارمەن اڭگىمەلەسىپ، ولاردىڭ ءومىرى مەن قىزمەتى تۋرالى اڭگىمەلەرىن تىڭدادى. وتانداستارىمىز پرەزيدەنتكە جۇمىستاعى جانە وقۋداعى جەتىستىكتەرىمەن قاتار بولاشاق جوسپارلارىمەن دە ءبولىستى.
قاسىم-جومارت توقايەۆ ءوز كەزەگىندە ەلىمىزدە جۇرگىزىلىپ جاتقان ساياسي رەفورمالار مەن حالىقتىڭ ءال-اۋقاتىن ارتتىرۋعا باعىتتالعان الەۋمەتتىك-ەكونوميكالىق وزگەرىستەر تۋرالى اڭگىمەلەدى.
«وتانداستارىمىز جۇمىستاعى جانە وقۋداعى جەتىستىكتەرىمەن ءبولىسىپ، قاسىم-جومارت توقاەۆقا بولاشاق جوسپارلارى تۋرالى ايتتى. كەزدەسۋ سوڭىندا پرەزيدەنت ستۋدەنتتەرگە جانە كورەيا رەسپۋبليكاسىندا تۇراتىن بارلىق قازاقستان ازاماتتارىنا تابىس تىلەدى»، — دەلىنگەن اقوردا حابارلاماسىندا.
ەسكە سالايىق، 14 قىركۇيەكتە قاسىم-جومارت توقايەۆ كورەيا رەسپۋبليكاسىنىڭ پرەزيدەنتى لي چجە مەننىڭ شاقىرۋىمەن وسى ەلگە مەملەكەتتىك ساپارمەن بارعان بولاتىن. سەۋلدەگى ساپارى بارىسىندا پرەزيدەنت وڭتۇستىك كورەيانىڭ مەملەكەتتىك جانە قوعام قايراتكەرلەرىن «دوستىق» وردەنىنىڭ II دارەجەسىمەن ماراپاتتادى.
كەشە مەملەكەت باسشىسى كورەيا رەسپۋبليكاسىنىڭ پرەمەر-مينيسترى حان سون سۋكپەن كەزدەسىپ، وندا ەلدەر اراسىنداعى ىنتىماقتاستىق تالقىلاندى. سودان كەيىن كورەيا رەسپۋبليكاسى پرەزيدەنتىنىڭ رەزيدەنسياسىندا قاسىم-جومارت توقاەۆتى رەسمي قارسى الۋ ءراسىمى ءوتىپ، لي چجە مەنمەن كەلىسسوزدەر جۇرگىزىلدى.