قازاقستان پرەزيدەنتى قاسىم-جومارت توقايەۆ «ق ر قاۋىپسىزدىك كەڭەسى اپپاراتىنىڭ كەيبىر ماسەلەلەرى جانە ق ر پرەزيدەنتىنىڭ كەيبىر اكتىلەرىنە وزگەرىستەر مەن تولىقتىرۋلار ەنگىزۋ تۋرالى» جارلىققا قول قويدى. قۇجات قاۋىپسىزدىك كەڭەسى مەن ونىڭ اپپاراتى تۋرالى ەرەجەلەردى بەكىتىپ، قازاقستان رەسپۋبليكاسى قاۋىپسىزدىك كەڭەسى ءتوراعاسىنىڭ ورىنباسارىنىڭ وكىلەتتىك شەڭبەرىن ايقىندايدى، دەپ حابارلايدى infohub.kz سايتى.
جارلىققا سايكەس، قاۋىپسىزدىك كەڭەسى مەن ونىڭ اپپاراتىنىڭ مىندەتتەرى رەتىندە جاھاندىق قاۋىپ-قاتەرلەر مەن سىن-تەگەۋرىندەردى، سونداي-اق ىشكى احۋالدىڭ وزەكتى تۇستارىن جان-جاقتى تالداۋ بەلگىلەندى.
قاۋىپسىزدىك كەڭەسى ءتوراعاسىنىڭ ورىنباسارىنىڭ وكىلەتتىك شەڭبەرىنە قاۋىپسىزدىك كەڭەسى ءتوراعاسىنىڭ اكتىلەرى مەن تاپسىرمالارىنىڭ، قاۋىپسىزدىك كەڭەسى شەشىمدەرىنىڭ، ونىڭ ىشىندە جەدەل كەڭەستەردە قابىلدانعاندارىنىڭ ءسوزسىز جانە تولىق ورىندالۋىن باقىلاۋدى ۇيىمداستىرۋ، ۇلتتىق قاۋىپسىزدىكتى، ەلدىڭ قورعانىس قابىلەتىن، زاڭدىلىق پەن قۇقىقتىق ءتارتىپتى قامتاماسىز ەتۋ سالاسىنداعى ءىس-شارالاردى ىسكە اسىرۋ بويىنشا مەملەكەتتىك ورگاندار مەن ۇيىمداردىڭ قىزمەتىن ۇيلەستىرۋ كىرەدى.
«قاۋىپسىزدىك كەڭەسى ءتوراعاسىنىڭ ورىنباسارى اقپاراتتىق جانە كيبەرقاۋىپسىزدىك، ونىڭ ىشىندە جاساندى ينتەللەكتىنى پايدالانۋ ماسەلەلەرىمەن، دەربەس دەرەكتەردى قورعاۋمەن، سىبايلاس جەمقورلىق پەن ەكونوميكالىق قىلمىسقا قارسى ىس-قيمىلمەن، ازاماتتىق قورعانىسپەن دە اينالىسادى. سونىمەن قاتار قاۋىپسىزدىك كەڭەسى ءتوراعاسىنىڭ ورىنباسارى جوعارىدا اتالعان شارالاردى ىسكە اسىرۋ بويىنشا مەملەكەتتىك ورگاندار مەن ۇيىمداردىڭ قىزمەتىن ۇيلەستىرىپ، حالىقارالىق ءوزارا ءىس-قيمىلدى جۇزەگە اسىرادى. قاۋىپسىزدىك كەڭەسى ءتوراعاسىنىڭ ورىنباسارى قاۋىپسىزدىك كەڭەسى اپپاراتىنىڭ قىزمەتىن دە ۇيلەستىرەدى»، — دەپ قوستى اقوردادا.
قاۋىپسىزدىك كەڭەسىنىڭ اپپاراتى دەربەس مەملەكەتتىك ورگان رەتىندە مەملەكەت باسشىسىنا تىكەلەي باعىنادى جانە وعان ەسەپ بەرەدى. قاۋىپسىزدىك كەڭەسى اپپاراتىنىڭ قىزمەتى ۇلتتىق قاۋىپسىزدىك سالاسىنداعى تاۋەكەلدەردى باقىلاۋدى كۇشەيتىپ جەتىلدىرۋگە، مەملەكەتتىك باسقارۋدىڭ تۇراقتىلىعىن قامتاماسىز ەتۋگە، ينستيتۋسيونالدىق قولداۋعا جانە قاۋىپسىزدىك كەڭەسى ءتوراعاسىنىڭ جانە قازاقستان رەسپۋبليكاسى قاۋىپسىزدىك كەڭەسىنىڭ شەشىمدەرىن ورىنداۋعا باعىتتالعان.
اتالعان مىندەتتەردى ىسكە اسىرۋ قازاقستان رەسپۋبليكاسىنىڭ ەگەمەندىگى مەن تاۋەلسىزدىگىن، اۋماقتىق تۇتاستىعىن، حالىقارالىق ارەناداعى ۇلتتىق مۇددەلەرىن جانە كونستيتۋسيالىق قۇرىلىس نەگىزدەرىن قورعاۋدى كۇشەيتۋگە باعىتتالعانى اتاپ ءوتىلدى.
ەسكە سالايىق، 29 تامىزدا قازاقستاندا قاۋىپسىزدىك كەڭەسىنىڭ اپپاراتى قۇرىلعان بولاتىن. ال 31 تامىزدا قازاقستان پرەزيدەنتى قاسىم-جومارت توقايەۆ جارلىققا قول قويىپ، ايدا بالاەۆانى ەلدىڭ قاۋىپسىزدىك كەڭەسى ءتوراعاسىنىڭ ورىنباسارى قىزمەتىنە تاعايىندادى.