قازاقستان پرەزيدەنتى قاسىم-جومارت توقايەۆ ومبىدا وتكەن قازاقستان مەن رەسەي اراسىنداعى XXII ءوڭىرارالىق ىنتىماقتاستىق فورۋمىندا رەسپۋبليكانىڭ رەسەي-ۋكراينا قاقتىعىسىن رەتتەۋگە دەلدال بولمايتىنىن مالىمدەدى، دەپ حابارلايدى infohub.kz سايتى.
«قازاقستان — بوتەن ەل ەمەس، الايدا بارلىق ۇسىنىستار مەن شاقىرۋلارعا قاراماستان، مەن دەلدال بولۋدان ۇزىلدى-كەسىلدى باس تارتامىن، سەبەبى رەسەي – ۇلى مەملەكەت، ورىس حالقى – ۇلى حالىق ەكەنىن بىلەمىن. ءارى، ايتقانداي، دەلدالسىز-اق كۇن تارتىبىندەگى ماسەلەلەردىڭ ءبارىن ءوزى شەشەدى. ءبىراق ءوز پىكىرىمدى ءدال بۇگىن ايتۋعا بەل بۋدىم، ويتكەنى ادامدار مەنىڭ ومبىعا باراتىنىمدى، كەزدەسۋدىڭ بولاتىنىن بىلەدى. ەشكىم جاعدايدان قالاي شىعۋعا بولاتىنىن بىلمەيدى، سەبەبى تاراپتاردىڭ ۇستانىمدارى بار. ەكىنشى جاعىنان، بۇل ءىستى مۇزداتىپ قويۋ مۇمكىندىگى بار. بۇل حالىقارالىق تاجىريبەدە سىنالعان ءادىس. ارينە، جاس ادامداردىڭ قازا بولۋى وكىنىشتى. ولار – باۋىرلاس رەسەي مەن ۋكراينا حالىقتارىنىڭ گەنوفوندى. وسىنىڭ ءبارىن توقتاتۋ كەرەك، ويتكەنى بولىپ جاتقان وقيعا، مەنىڭ كوزقاراسىمشا، رەسەيگە دە، ۋكراينا مەملەكەتىنە دە قارسىلاستاردىڭ پايداسىنا جانە قۋانىشىنا عانا قىزمەت ەتەدى»، — دەپ قوستى توقايەۆ.
ومبىعا ساپارى بارىسىندا پرەزيدەنت سوعىس ارداگەرلەرىنە ارنالعان ومبى گوسپيتالى عيماراتىنىڭ قاسبەتىندەگى كەمەل توقاەۆتىڭ مەموريالدىق تاقتاسىنا گۇل شوعىن قويدى. كەيىن قاسىم-جومارت توقايەۆ فورۋم اياسىندا رەسەي پرەزيدەنتى ۆلاديمير پۋتينمەن كەزدەسۋ وتكىزدى.