قازاقستان پرەزيدەنتى قاسىم-جومارت توقايەۆ سەۋلگە ساپارى بارىسىندا وڭتۇستىك كورەيانىڭ مەملەكەتتىك جانە قوعامدىق قايراتكەرلەرىنە «دوستىق» وردەنىنىڭ II دارەجەسىن تاپسىردى. ماراپاتتاۋ ءراسىمى وڭتۇستىك كورەيا استاناسىندا ءوتتى، دەپ حابارلايدى infohub.kz سايتى.
ءىس-شاراعا قاتىسۋشىلارعا ءسوز سويلەگەن مەملەكەت باسشىسى قازاق پەن كورەي حالقىن الدەقاشان بەرىك دوستىق بايلانىستىرىپ كەلە جاتقانىن اتاپ ءوتتى.
«ەلدەرىمىزدىڭ اراسى الىس بولعانىمەن، ءبىزدى ءوزارا قۇرمەت پەن ورتاق مۇددە جاقىنداستىرادى. كورەي ەكونوميكاسى باسەكە مەن سىن-قاتەرلەرگە قارسى تۇرىپ، تابىستى دامىپ كەلەدى. بۇعان حالىقتىڭ ەڭبەكقورلىعى مەن ءىرى بيزنەستىڭ كۇش-جىگەرىنىڭ ارقاسىندا قول جەتكىزىلدى. قازاق حالقى مەن بيلىك وكىلدەرى دوستىق كورەياعا شىنايى قۇرمەتپەن قارايدى. وڭتۇستىك كورەيا — قازاقستاننىڭ ستراتەگيالىق سەرىكتەسى. ءبىز كورەيانى حالىقارالىق ارەنادا جوعارى بەدەلگە يە مەملەكەت رەتىندە قاراستىرامىز. كوپقىرلى ىنتىماقتاستىعىمىز جىل سايىن نىعايىپ كەلەدى. بەس جىل بۇرىن كەڭەيتىلگەن ستراتەگيالىق سەرىكتەستىك تۋرالى دەكلاراسيا قابىلدانعان ەدى»، — دەدى قاسىم-جومارت توقايەۆ.
ول ەكى مەملەكەت اراسىندا تىعىز ساياسي ديالوگ ورنىققانىن جانە كوپسالالى ىنتىماقتاستىق نىعايىپ كەلە جاتقانىن اتاپ ءوتتى.
«ساۋدا-ەكونوميكالىق قاتىناستار قارقىندى دامىپ كەلەدى. ءبىز ماشينا جاساۋ، ەنەرگەتيكا، مەتاللۋرگيا، وزىق تەحنولوگيالار جانە باسقا دا سالالاردا ءبىرقاتار اۋقىمدى جوبالاردى جۇزەگە اسىرىپ جاتىرمىز. الەمگە ايگىلى كورەي كومپانيالارى ەلىمىزدە تابىستى جۇمىس ىستەپ كەلەدى. مادەني جانە گۋمانيتارلىق بايلانىستارىمىز دا نىعايىپ كەلەدى»، — دەدى پرەزيدەنت.
ءوز سوزىندە مەملەكەت باسشىسى قازاقستانداعى كورەي قاۋىمداستىعىنىڭ كورەيامەن بايلانىستى نىعايتۋداعى ماڭىزدى ءرولىن ەرەكشە اتاپ ءوتتى.
«قازىرگى تاڭدا قازاقستاندا ءجۇز مىڭنان استام كورەي حالقىنىڭ وكىلى تۇرادى. ولار ەلىمىزدىڭ ەكونوميكالىق جانە الەۋمەتتىك-ساياسي دامۋىندا ماڭىزدى ءرول اتقارادى. بىزدە بارلىق ەتنيكالىق توپتار ءۇشىن قولايلى جاعداي جاسالعان. كورو-سارام قاۋىمداستىعى قازاق جەرىندە بەيبىت ءارى كەلىسىمدە ءومىر ءسۇرىپ، بىرلىك پەن ىنتىماقتى نىعايتۋعا ەلەۋلى ۇلەس قوسىپ كەلەدى. قازاقستاندا كورەي مادەني ورتالىقتارى جۇمىس ىستەيدى. الماتىداعى اكادەميالىق كورەي تەاترى كورەرمەننىڭ قۇرمەتى مەن سۇيىسپەنشىلىگىنە بولەنگەن. كورەي تىلىندە گازەت شىعىپ، ارنايى راديوباعدارلاما ەفيرگە شىعادى»، — دەدى قاسىم-جومارت توقايەۆ.
مەملەكەت باسشىسى قازاقستان مەن كورەيا دوستىعىنىڭ نىعايۋى ەكى حالىقتىڭ ورتاق مۇددەسىنە ساي كەلەتىنىنە سەنىم ءبىلدىردى.
«بۇگىنگى كۇندى قازاق-كورەي قاتىناستارى ءۇشىن وتە ماڭىزدى دەپ سانايمىن. وسى ساپار اياسىندا وڭتۇستىك كورەيانىڭ كورنەكتى مەملەكەتتىك جانە قوعامدىق قايراتكەرلەرىنە «دوستىق» وردەنىنىڭ II دارەجەسىن تاپسىرۋ تۋرالى شەشىم قابىلدادىم. بۇل — قازاق حالقىنىڭ شىنايى قۇرمەتى مەن ءىلتيپاتىنىڭ بەلگىسى. سىزدەر بولاشاقتا دا ەلدەرىمىز اراسىنداعى بايلانىستى نىعايتۋعا ەلەۋلى ۇلەس قوساسىزدار دەپ سەنەمىن»، — دەدى پرەزيدەنت ماراپاتتالعاندارعا قاراتا.