قازاقستان مەن كورەيا رەسپۋبليكاسى جالپى سوماسى 19 ميلليارد دوللار بولاتىن كوممەرسيالىق كەلىسىمدەر پاكەتىنە قول قويدى. بۇل تۋرالى قازاقستان پرەزيدەنتى قاسىم-جومارت توقايەۆ سەۋلدە كورەيا رەسپۋبليكاسىنىڭ پرەزيدەنتى لي چجە مونمەن كەلىسسوزدەر بارىسىندا مالىمدەدى، دەپ حابارلايدى infohub.kz سايتى.
مەملەكەت باسشىلارىنىڭ كەزدەسۋى ەكى ەلدىڭ ىسكەر توپتارى وكىلدەرىنىڭ قاتىسۋىمەن وتكەن دوڭگەلەك ۇستەلدەن كەيىن ءوتتى.
«ەكىجاقتى قارىم-قاتىناسقا كەلەر بولساق، وسى ساپار اياسىندا 19 ملرد دوللارلىق كوممەرسيالىق كەلىسىمدەرگە قول قويىلدى. ءبىز كورەي ينۆەستورلارىمەن جۇمىسقا ريزامىز جانە ولارمەن ءارى قاراي جۇمىس ىستەۋگە دايىنبىز. قوناق ۇيلەر سالۋ، مۇناي وڭدەۋ زاۋىتى جانە قالا قۇرىلىسى بويىنشا جاقسى جوسپارلار بار. مادەني-گۋمانيتارلىق بايلانىستاردى نىعايتۋعا ەرەكشە كوڭىل بولىنۋدە»، — دەدى توقايەۆ.
ەكىجاقتى دامۋدىڭ نەگىزگى باعىتى رەتىندە تاراپتار الماتى وبلىسىنداعى جاڭا مەگاجوبا — الاتاۋ قالاسىن دامىتۋدى بەلگىلەدى. قازاقستان پرەزيدەنتى شەتەلدىك ينۆەستورلارعا بارىنشا زاڭدىق قاۋىپسىزدىك قامتاماسىز ەتىلەتىنىن اتاپ ءوتتى.
«جوسپارلارىمىز وتە اۋقىمدى. اتاپ ايتقاندا، Alatau City جوباسىن ودان ءارى دامىتۋ ماسەلەسىن ەگجەي-تەگجەيلى تالقىلادىق. بۇل شىنىمەن دە وتە ماڭىزدى جوبا، ءبىز وعان ۇلكەن ءمان بەرەمىز. وسى قالانىڭ مارتەبەسىنە قاتىستى ەرەجەلەر كونستيتۋسياعا ەنگىزىلدى. كورەي كومپانيالارىنا بارلىق قۇقىقتىق كەپىلدىكتەر بەرىلەتىن بولادى»، — دەدى قازاقستان پرەزيدەنتى.
اڭگىمە بارىسىندا كورەيا رەسپۋبليكاسىنىڭ پرەزيدەنتى لي چجە ءمون قازاقستاننىڭ بۇكىل حالقىنا جانە جەكە قاسىم-جومارت توقاەۆقا كورەيانىڭ ۇلتتىق باتىرى — گەنەرال حون بوم دونىڭ سۇيەگىن تاريحي وتانىنا قايتارۋ تۋرالى شەشىمى ءۇشىن العىس ءبىلدىردى.
«كورەيا تاريحىندا ەرەكشە ءرول اتقارعان جانە قيىن-قىستاۋ كەزەڭدەردە كورەي حالقىن قورعاعان گەنەرال حون بوم دونىڭ سۇيەگىن قايتارۋ تۋرالى قابىلداعان شەشىمىڭىز ءۇشىن العىس ايتامىز. قازاقستاندا كورەي ازاماتتارى ءبىر كەزدەرى وتە جىلى قابىلداندى. وسى ءۇشىن سىزگە جانە بۇكىل قازاق حالقىنا ريزامىز»، — دەپ اتاپ ءوتتى لي چجە ءمون.
ءوز كەزەگىندە توقايەۆ قازاقستاندا 120 مىڭنان استام ەتنيكالىق كورەي تۇراتىنىن، ولار ەلدىڭ بەلسەندى ازاماتتارى ەكەنىن جانە استانا مەن سەۋل اراسىنداعى دوستىقتىڭ تابيعي «ءتىرى كوپىرى» قىزمەتىن اتقاراتىنىن اتاپ ءوتتى.
بۇعان دەيىن «كۋرسيۆ» قاسىم-جومارت توقاەۆتىڭ كورەيا رەسپۋبليكاسىنىڭ پرەمەر-مينيسترى حان سون سۋكپەن كەزدەسكەنىن جازعان بولاتىن. كەزدەسۋدە ول كورەيامەن تاۋار اينالىمىن ەكى ەسەگە ۇلعايتۋدى جانە 2030 جىلعا دەيىنگى باعدارلاما دايىنداۋدى، سونداي-اق قازاقستاندا بەيبىت اتومدى يگەرۋدى ۇسىندى.