قازاقستان پرەزيدەنتى قاسىم-جومارت توقايەۆ وسكەلەڭ ۇرپاق ءۇشىن قولايلى جانە ءقاۋىپسىز ورتا قۇرۋ قاجەتتىگىن ايتتى، دەپ حابارلايدى infohub.kz سايتى.
جيىن بارىسىندا مەملەكەت باسشىسى ۇكىمەتتىڭ 16 جاسقا تولماعان بالالاردىڭ الەۋمەتتىك جەلىلەردە تىركەلۋىنە زاڭ جۇزىندە تىيىم سالۋ تۋرالى باستاماسىن قولدادى. «بۇل تاقىرىپقا مەن جاقىندا وتكەن تامىز كونفەرەنسياسىندا ەگجەي-تەگجەيلى توقتالدىم. مۇنداي شارالاردى كوپتەگەن ەلدەر قابىلداپ جاتىر. مەن بۇل باستامانى قولدايمىن. بۇل ماسەلە باسىم تارتىپپەن قارالۋى كەرەك دەپ سانايمىن»، — دەپ اتاپ ءوتتى توقايەۆ.
پرەزيدەنت زاڭ جوباسىن قابىلداۋ كەزىندە ونى ىسكە اسىرۋدىڭ بارلىق تەتىكتەرىن الدىن الا پىسىقتاۋ قاجەتتىگىن، نورماتيۆتىك اكتىلەر قاعاز جۇزىندە قالماۋى كەرەكتىگىن ايتتى. «سونىمەن قاتار، ەنەرگەتيكا سالاسىنىڭ تەحنولوگيالىق تۇراقتىلىعىن قامتاماسىز ەتۋگە جانە بالامالى ەنەرگيا كوزدەرىن دامىتۋعا باعىتتالعان زاڭ جوبالارىن قاراۋدى جەدەلدەتۋ ماڭىزدى. ونلاين-پلاتفورمالار مەن بۇقارالىق اقپارات قۇرالدارىنىڭ قىزمەتىن رەتتەيتىن زاڭدارعا دا ەرەكشە نازار اۋدارۋ كەرەك. ازاماتتاردىڭ قۇقىقتارى مەن زاڭدى مۇددەلەرىن اقپاراتتىق كەڭىستىكتە قورعاۋ ءۇشىن قوسىمشا شارالار قابىلداۋ قاجەت»، — دەپ قوستى پرەزيدەنت.