قازاقستان پرەزيدەنتى قاسىم-جومارت توقايەۆ «تازا قازاقستان» رەسپۋبليكالىق باستاماسىنىڭ جۇزەگە اسىرىلۋ بارىسى تۋرالى بەيىندى مەملەكەتتىك ورگاندار باسشىلارىنىڭ ەسەپتەرىن تىڭدادى، دەپ حابارلايدى infohub.kz سايتى.
قازاقستان رەسپۋبليكاسى پرەزيدەنتىنىڭ رەسمي Telegram-ارناسىندا جاريالانعان اقپاراتقا سايكەس، استانا اكىمى جەڭىس قاسىمبەك ەلوردانى كەشەندى كوگالداندىرۋ جانە اباتتاندىرۋ تۋرالى بايانداما جاسادى.
ونىڭ ايتۋىنشا، سوڭعى جىلدارى استانادا 500-گە جۋىق اۋلا مەن قوعامدىق كەڭىستىك اباتتاندىرىلعان. اعىمداعى جىلدىڭ سوڭىنا دەيىن ساياباقتار، سكۆەرلەر مەن بۋلۆارلاردى قوسا العاندا، 170-تەن استام اۋلا مەن قوعامدىق ايماقتى جايلاستىرۋ جوسپارلانعان.
قاسىم-جومارت توقاەۆقا ەسىل وزەنىنىڭ بويىندا ءبىرىڭعاي قوعامدىق جانە رەكرەاسيالىق كەڭىستىكتەر جۇيەسىن قالىپتاستىرۋ بارىسى تۋرالى مالىمەت بەرىلدى. بۇل جۇمىستار اياسىندا قالانىڭ ءارتۇرلى بولىكتەرىندەگى ساياباقتاردى، سەرۋەندەۋ جانە سپورت الاڭدارىن بىرىكتىرەتىن ۇزدىكسىز جاسىل مارشرۋت قۇرۋ جوسپارلانۋدا.
ەكولوگيا جانە تابيعي رەسۋرستار ءمينيسترى الىبەك قۋانتىروۆ «تازا قازاقستان» باستاماسى ىسكە اسىرىلعان جىلدار ىشىندە بۇكىل ەل بويىنشا 2 مىڭنان استام ەكولوگيالىق ءىس-شارا وتكىزىلگەنىن باياندادى. وسى ءىس-شارالار اياسىندا 3،8 ملن توننادان استام قالدىق جينالىپ، 10 مىڭعا جۋىق قوقىس ءۇيىندىسى جويىلدى.
ەسكە سالايىق، بۇگىن «تازا قازاقستان» رەسپۋبليكالىق ەكولوگيالىق اكسياسى اياسىندا قاسىم-جومارت توقايەۆ جاستار مەن ەكواكتيۆيستەرمەن بىرگە پرەزيدەنت ساياباعىنىڭ اۋماعىندا اعاش وتىرعىزۋعا قاتىستى.