مەملەكەت باسشىسى قاسىم-جومارت توقايەۆ استاناعا تمد ۆولونتەرلەر فورۋمىنا قاتىسۋ ءۇشىن كەلگەن بۇۇ ەرىكتىلەر باعدارلاماسىنىڭ اتقارۋشى ۇيلەستىرۋشىسى تويلي كۋربانوۆپەن كەزدەستى. بۇل تۋرالى infohub.kz سايتى حابارلايدى.
اڭگىمە بارىسىندا قازاقستان پرەزيدەنتى تويلي كۋربانوۆقا رەسپۋبليكانىڭ ۆولونتەرلىك سالاداعى باستامالارىن تۇراقتى قولداپ كەلە جاتقانى ءۇشىن العىس ءبىلدىرىپ، ونىڭ فورۋمعا قاتىسۋىنىڭ ماڭىزدىلىعىن اتاپ ءوتتى. قاسىم-جومارت توقايەۆ قازاقستان ۆولونتەرلىك قوزعالىستى دامىتۋعا ەرەكشە كوڭىل بولەتىنىن ايتىپ، استانانىڭ 2026 جىلدى تۇراقتى دامۋ ءۇشىن حالىقارالىق ەرىكتىلەر جىلى دەپ جاريالاۋ تۋرالى ۇسىنىسىن بۇۇ باس اسسامبلەياسى قولداعانىن ەسكە سالدى.
«ءبىز ۆولونتەرلىكتى مەملەكەتتىك ساياسات تۇرعىسىنان شىنايى ءپاتريوتيزمنىڭ كورىنىسى جانە، ارينە، مەملەكەتتىڭ جاستاردى قولداۋى دەپ قاراستىرامىز. مەنىڭ باستامام بويىنشا جاڭا كونستيتۋسياعا ۆولونتەرلىك قاعيداتى ەنگىزىلدى. وندا العاش رەت كونستيتۋسيالىق دەڭگەيدە ۆولونتەرلىك قىزمەتتى ىنتالاندىرۋ بەكىتىلدى»، — دەدى پرەزيدەنت.
حالىقارالىق ەرىكتىلەر جىلى اياسىندا قازاقستاندا مىڭنان استام ءىس-شارا وتكىزىلۋدە، ال ەلدەگى ۆولونتەرلەر سانى 300 مىڭعا جۋىقتادى. سونىمەن قاتار، 2030 جىلعا دەيىنگى ۆولونتەرلىك قوزعالىستى دامىتۋ تۇجىرىمداماسى ازىرلەنۋدە، ۆولونتەردىڭ سيفرلىق پاسپورتى ەنگىزىلۋدە، مەملەكەتتىك قولداۋ مەن وڭىرلىك ينفراقۇرىلىم جەتىلدىرىلۋدە.
تويلي كۋربانوۆ ءوز كەزەگىندە مەملەكەت باسشىسىنا ۆولونتەرلىكتى دامىتۋعا كوڭىل بولگەنى ءۇشىن العىس ايتىپ، بۇۇ ەرىكتىلەر باعدارلاماسىمەن ىنتىماقتاستىقتىڭ جوعارى دەڭگەيىن، سونداي-اق حالىقارالىق ەرىكتىلەر جىلى اياسىنداعى بىرلەسكەن جۇمىستىڭ ۇيلەسىمدىلىگىن اتاپ ءوتتى. ول: «قازاقستان — ۆولونتەرلىك سالادا وسىنداي بيىكتەرگە جەتكەن جالعىز ەل. 60-تان استام ەل قازاقستاننىڭ ەرىكتىلەر جىلىن جاريالاۋ تۋرالى باستاماسىن قولدادى. ءسىز الەمدىك ترەندتەردى بەلگىلەيسىز، "تازا قازاقستان" سياقتى قوعامدىق اكسيا ءبىرقاتار ەلدەردە ۇلكەن قىزىعۋشىلىق تۋدىردى»، — دەدى.
كەزدەسۋ سوڭىندا قاسىم-جومارت توقايەۆ تويلي كۋربانوۆتى قازاقستاندا ۆولونتەرلىكتى دامىتۋعا قوسقان ەلەۋلى ۇلەسى ءۇشىن «دوستىق» وردەنىنىڭ II دارەجەسىمەن ماراپاتتادى.