قازاقستان پرەزيدەنتى قاسىم-جومارت توقايەۆ ەلدەگى جول ساپاسى مەن جاڭا تۇرعىن ءۇي قۇرىلىسىنا قاتىستى سىندى ءسوز ەتىپ، جول سالاسىن تۇبەگەيلى رەفورمالاۋ جانە قۇرىلىس جۇمىستارىنىڭ بارلىق كەزەڭىندە باقىلاۋدى كۇشەيتۋ قاجەتتىگىن ايتتى، دەپ حابارلايدى infohub.kz سايتى.
مەملەكەت باسشىسىنىڭ ايتۋىنشا، وڭىرلەردى دامىتۋ — مەملەكەتتىڭ باستى مىندەتتەرىنىڭ ءبىرى. سوڭعى جىلدارى بۇل باعىتتا اۋقىمدى جۇمىستار اتقارىلدى. ەلدىڭ بارلىق وڭىرىندە تۇرعىن ۇيلەر، الەۋمەتتىك نىساندار مەن جولدار قارقىندى سالىنۋدا.
«قازاقستان بىرتىندەپ ۇلكەن قۇرىلىس الاڭىنا اينالىپ كەلەدى. مۇنى ءبارىڭىز دە كورىپ، بىلەسىزدەر. ەڭ باستىسى – بارلىق قۇرىلىس جۇمىستارىنىڭ جوعارى ساپاسىن جانە ۋاقىتىندا اياقتالۋىن قامتاماسىز ەتۋ»، — دەدى پرەزيدەنت.
سونىمەن قاتار، توقايەۆ اتاپ وتكەندەي، كەيبىر جاڭا قۇرىلىستاردىڭ ساپاسى سىن كوتەرمەيدى، ءتىپتى قوعامدىق سىنعا دا اينالىپ وتىر. جۇمىستى مۇنداي سالعىرتتىقپەن ورىنداۋ تراگەديالىق سالدارعا اكەلۋى مۇمكىن.
مەملەكەت باسشىسىنىڭ باعاسىنشا، جول سالاسىنداعى احۋال دا كوڭىل كونشىتپەيدى. مىسال رەتىندە ول تالدىقورعان – وسكەمەن اۆتوماگيسترالىن اتادى: اشىلعانىنا كوپ ۋاقىت وتپەسە دە، جول توسەمى بۇزىلا باستاعان.
وسىعان بايلانىستى پرەزيدەنت جول قۇرىلىسىنىڭ ساپاسىن باعالاۋ جۇيەسىن قايتا قاراۋ جانە قۇرىلىس جۇمىستارىن باسىنان تولىق اياقتالعانعا دەيىنگى بارلىق كەزەڭدە قاتاڭ باقىلاۋدى قامتاماسىز ەتۋ قاجەتتىگىن كورسەتتى.
بۇدان بولەك، توقايەۆ «جول اكتيۆتەرىنىڭ ساپاسى جونىندەگى ۇلتتىق ورتالىق» مەكەمەسىنىڭ جۇمىسىن كۇشەيتۋدى تالاپ ەتتى. ونىڭ ايتۋىنشا، بۇل سالاعا تۇبەگەيلى رەفورما قاجەت، سونداي-اق قوعامدىق باقىلاۋدى كۇشەيتۋ كەرەك.