قازاقستان پرەزيدەنتى قاسىم-جومارت توقايەۆ ومبىدا ءوتىپ جاتقان قازاقستان مەن رەسەيدىڭ XXII ءوڭىرارالىق ىنتىماقتاستىق فورۋمى بارىسىندا ۋكرايناداعى قاقتىعىستى مۇزداتۋدى ۇسىنىپ، ونىڭ «تابيعاتىنىڭ بەلگىسىزدىگىن» اتاپ ءوتتى، دەپ حابارلايدى infohub.kz سايتى.
مەملەكەت باسشىسى رەسەي مەن ۋكراينا اراسىنداعى قاقتىعىستى رەتتەۋ ماسەلەسى بويىنشا ءوز ۇستانىمىن ءبىلدىردى. «بىلەسىز بە، مەن باسىنان ايتتىم، بۇل — مەملەكەتارالىق قاقتىعىس. ەشقانداي ازاماتتىق سوعىس تۋرالى ءسوز جوق. ءبىز ۋكراين حالقىنا، ونىڭ مادەنيەتى مەن تىلىنە ءارقاشان قۇرمەتپەن قارادىق. جانە بۇل قاقتىعىستىڭ تابيعاتى كوپشىلىككە، سونىڭ ىشىندە بىزگە دە تولىق تۇسىنىكسىز دەپ سانايمىن. ءسىزدىڭ الياسكاداعى انكوريدج كەزدەسۋىندە ديپلوماتيالىق يكەمدىلىكتىڭ بارىنشا ۇلگىسىن كورسەتكەنىڭىزدى بىلەمىن. مەنەن سۇراعاندىقتان، ءبىزدىڭ قاراپايىم پىكىرىم: مۇمكىن، بۇل قاقتىعىستى مۇزداتىپ، ىستامبۇل فورمۋلاسى 2.0-گە ورالۋ كەرەك شىعار، ويتكەنى وندا ايتارلىقتاي ناتيجەلەرگە قول جەتكىزىلگەن ەدى. سودان كەيىن، ارينە، رەسەيدى قوسا العاندا، ۇلى دەرجاۆالاردىڭ كەپىلدىگىمەن ۇزاق كۇتكەن بەيبىتشىلىككە قاراي جىلجۋ كەرەك»، – دەدى قاسىم-جومارت توقايەۆ.
ءسوز سوڭىندا مەملەكەت باسشىسى رەسەيمەن ستراتەگيالىق ارىپتەستىك پەن وداقتاستىققا بەرىكتىگىن راستادى. «رەسەيگە قاتىستى قازاقستاننىڭ ۇستانىمىنا كۇماندانباڭىزدار، ءبىز ءارقاشان رەسەيدى ۇلى مەملەكەت دەپ سانادىق جانە سانايمىز. مەن بۇل تۋرالى بارلىق حالىقارالىق فورۋمداردا ايتامىن. ءبىز رەسەيمەن ستراتەگيالىق ىنتىماقتاستىققا، وداقتاستىق قارىم-قاتىناستارعا بەرىكپىز، بۇل قانشالىقتى قيىن بولسا دا. ال بۇگىنگى فورۋم وسىنىڭ دالەلى»، – دەپ اتاپ ءوتتى توقايەۆ.
قازاقستان پرەزيدەنتى ومبىعا فورۋمعا قاتىسۋ ءۇشىن كەلدى، سونداي-اق سوعىس ارداگەرلەرىنە ارنالعان ومبى گوسپيتالىنىڭ عيماراتىنىڭ قاسبەتىنە ورناتىلعان كەمەل توقاەۆتىڭ مەموريالدىق تاقتاسىنا گۇل شوقتارىن قويدى. كەيىن قاسىم-جومارت توقايەۆ رەسەي پرەزيدەنتى ۆلاديمير پۋتينمەن كەزدەستى.