قازاقستاندا قاندى قاڭتار وقيعاسىنا ءتورت جىل تولعالى جاتقان شاقتا، حالىقارالىق ساراپشىلار بۇل وقيعا قاسىم-جومارت توقاەۆتىڭ تولىق بيلىككە يە بولۋىنا جول اشقانىمەن، ەلدەگى ساياسي جۇيەنى تۇبەگەيلى وزگەرتە الماعانىن ايتادى، دەپ حابارلايدى infohub.kz سايتى.
The Diplomat باسىلىمى جاريالاعان تالداۋعا سايكەس، قازىرگى ۇكىمەت "جاڭا قازاقستان" ۇرانىمەن ەسكى ەليتانى ىعىستىرعانىمەن، سۋپەرپرەزيدەنتتىك جۇيەنى ساقتاپ قالدى. ساراپشى ديماش ءالجانوۆتىڭ ايتۋىنشا، 2022 جىلدان بەرى تۇڭعىش پرەزيدەنتتىڭ وتباسى مەن جاقىن اينالاسىنا تيەسىلى اكتيۆتەردى قايتارۋ پروسەسى قارقىندى ءجۇرىپ جاتىر. الايدا بۇل پروسەسس اشىق بولماعانىنا كۇدىك بار. رەسمي مالىمەت بويىنشا، قايرات ساتىبالدى مەملەكەتكە 1،6 ميلليارد دوللار قۇنىنداعى اكتيۆ قايتارعان. ونىڭ ىشىندە "قازاقتەلەكوم" اكسيالارى، جىلجىمايتىن م ۇلىك جانە قىمبات اشەكەيلەر بار. قايرات بورانبايەۆ 270 ميلليون دوللار اكتيۆىن تاپسىرىپ، بوستاندىققا شىقتى.
دەگەنمەن، شەتەلدىك باسىلىمنىڭ پايىمداۋىنشا، بۇل شارالار وليگارحيالىق جۇيەنى جويعان جوق، تەك بايلىقتى ەليتا ىشىندە قايتا بولۋگە قىزمەت ەتتى. مىسالى، بۇرىن نازاربايەۆ قورىنا قاراستى Jusan بانكى مەن بولات وندىرەتىن Qarmet (بۇرىنعى ArcelorMittal) جاڭا ينۆەستورلاردىڭ قولىنا ءوتتى. ەسكى قازاقستان وكىلدەرى كەتكەنىمەن، ولاردىڭ ورنىن جاڭا لويالدى بيزنەسمەندەر باسىپ وتىر.
ماقالادا كوتەرىلگەن باستى ماسەلە – الداعى ساياسي كەزەڭ. قازىرگى پرەزيدەنتتىڭ مانداتى 2029 جىلى اياقتالادى. ساراپشىلاردىڭ بولجامىنشا، اقوردادا ەكى سەناري قاراستىرىلۋى مۇمكىن: كونستيتۋسيانى وزگەرتىپ مەرزىمدى ۇزارتۋ نەمەسە بيلىكتى مۇراگەرگە بەرۋ وپەراسياسىن دايىنداۋ. وسى ورايدا، 2027 جىلى رەفەرەندۋم ءوتىپ، پارلامەنت قۇرىلىمى وزگەرۋى مۇمكىن. جوسپار بويىنشا، سەنات (جوعارعى پالاتا) جويىلىپ، ءبىر پالاتالى پارلامەنت قۇرىلۋى ىقتيمال. بۇل وزگەرىس پرەزيدەنتكە بيلىك ءترانزيتىن باقىلاۋدى جەڭىلدەتۋ ءۇشىن جاسالۋى مۇمكىن قادام رەتىندە باعالانۋدا.