قازاقستاندا «ترامادول لانناحەر» دارىلىك پرەپاراتىنىڭ 100 جانە 150 مگ دوزالارىنداعى تىركەۋ كۋالىكتەرىن كەرى قايتارۋ تۋرالى شەشىم قابىلداندى. ءتيىستى بۇيرىققا ق ر دەنساۋلىق ساقتاۋ مينيسترلىگى مەديسينالىق جانە فارماسەۆتيكالىق باقىلاۋ كوميتەتىنىڭ ءتوراعاسى باۋىرجان دجۋسيپوۆ قول قويدى، دەپ حابارلايدى infohub.kz سايتى.
قۇجاتقا سايكەس، «ترامادول لانناحەر، رەتارد تابلەتكالار، پلەنكالى قابىقپەن قاپتالعان، 100 مگ، 150 مگ» دارىلىك پرەپاراتىنىڭ لپ-№011908-رگ-KZ جانە لپ-№011907-رگ-KZ نومىرلەرىمەن تىركەۋ كۋالىكتەرى كەرى قايتارىلۋعا جاتادى. تىركەۋ كۋالىگىنىڭ يەسى — رەسەيلىك «باۋش حەلس» ج ش س كومپانياسى.
كوميتەتتىڭ اۋماقتىق بولىمشەلەرىنە ءبىر كۇن ىشىندە وبلىستار مەن قالالاردىڭ بارلىق جەرگىلىكتى دەنساۋلىق ساقتاۋ باسقارمالارىن، سونداي-اق باسقا دا مەملەكەتتىك ورگانداردى تىركەۋدىڭ كەرى قايتارىلعانى تۋرالى حاباردار ەتۋ تاپسىرىلدى. بۇيرىقتىڭ ورىندالۋىن باقىلاۋ كوميتەت ءتوراعاسىنىڭ جەتەكشىلىك ەتەتىن ورىنباسارىنا جۇكتەلدى.
Lada.kz اتاپ وتكەندەي، تىركەۋدىڭ كەرى قايتارىلۋى «ترامادولدىڭ» قازاقستاندىق ءدارىحانالار سورەلەرىنەن تولىق جوعالۋىن بىلدىرمەيدى. ماسەلە تەك ناقتى جەتكىزۋشىنىڭ «ترامادول لانناحەر» پرەپاراتىنىڭ 100 جانە 150 مگ دوزالارى تۋرالى بولىپ وتىر. قۇرامىندا ترامادول بار باسقا دارىلىك پرەپاراتتار ەل ءدارىحانالارىندا قولجەتىمدى بولادى.
كوميتەتتە تىركەۋ كۋالىكتەرىنىڭ كەرى قايتارىلۋى پرەپاراتتاردىڭ ساپا، تيىمدىلىك نەمەسە قاۋىپسىزدىك تالاپتارىنا سايكەس كەلمەۋىنە بايلانىستى ەمەس ەكەنىن اتاپ ءوتتى.
بۇعان دەيىن «كۋرسيۆ» «ترامادول» تەك ارنايى ليسەنزياسى بار ءدارىحانالاردا دارىگەردىڭ رەسەپتى بويىنشا عانا ساتىلاتىنىن حابارلاعان. بۇل پسيحوتروپتى انالگەتيكتى رەسەپتسىز ساتقانى ءۇشىن فارماسەۆتتەر مەن مەديسينا قىزمەتكەرلەرىنە 10 جىلدان 15 جىلعا دەيىن باس بوستاندىعىنان ايىرۋ تۇرىندەگى قىلمىستىق جاۋاپكەرشىلىك قاراستىرىلعان.