اقش پرەزيدەنتى دونالد ترامپ امەريكاندىق كينويندۋسترياداعى داعدارىستى مالىمدەپ، جەرگىلىكتى ستۋديالارعا سالىق جەڭىلدىكتەرىن ەنگىزۋدى كونگرەسكە ۇسىندى، دەپ حابارلايدى infohub.kz سايتى.
بۇل باستامانى ول «وسكار» سىيلىعىنىڭ يەگەرى، اكتەر دجون ۆويتپەن كەزدەسۋدە تالقىلادى. بۇعان دەيىن ترامپ ونى گولليۆۋد ىستەرى جونىندەگى ءوزىنىڭ ارنايى وكىلى ەتىپ تاعايىنداعان بولاتىن.
«گولليۆۋد — بۇل تولىق جانە مۇلدەم اپات! اتاعى داڭقتى بولعانىمەن، وندا جۇمىس مۇلدەم جوق. ءوندىرىس كانادا مەن باسقا ەلدەرگە كوشىپ كەتتى، ال اقش-تا ەشتەڭە تۇسىرىلمەيدى. دجون جانە سالانىڭ باسقا دا كوپتەگەن وكىلدەرى فەدەرالدى سالىق ىنتالاندىرۋلارىن ەنگىزۋدى ۇسىنىپ وتىر، ءبىزدىڭ كينو بيزنەسىمىزدى قايتادان ۇلى ەتۋ ءۇشىن»، — دەدى اق ءۇيدىڭ باسشىسى.
اقش پرەزيدەنتى ستۋديالاردىڭ شەتەلگە جاپپاي كەتۋى كاليفورنيا مەن باسقا شتاتتارعا ەلەۋلى ەكونوميكالىق زيان كەلتىرەدى دەپ سانايدى.
ترامپ بۇل ماسەلە بويىنشا كونگرەستەگى ەكى پارتيانىڭ كوشباسشىلارىمەن كونسۋلتاسيالار ۇيىمداستىرعىسى كەلەدى جانە سالىق جەڭىلدىكتەرىنە امەريكاندىق بيۋدجەتتىڭ شىعىندارى جۇمىسپەن قامتۋدىڭ ءوسۋى مەن فەدەرالدى بيۋدجەت كىرىستەرىنىڭ ارقاسىندا «ون ەسە وتەلەدى» دەگەن سەنىم ءبىلدىردى.