اقش پرەزيدەنتى دونالد ترامپ جاساندى ينتەللەكتتىڭ قارقىندى دامۋىن توقتاتا تۇرۋ تۋرالى ۇسىنىسقا قارسى شىقتى. بۇل ۇسىنىستى بۇعان دەيىن Anthropic كومپانياسىنىڭ باسشىسى داريو امەدەي جاساعان بولاتىن. امەريكا كوشباسشىسىنىڭ ايتۋىنشا، مۇنداي باستامالاردىڭ ارتىندا «تاۋەكەلدەردى اسىرا كورسەتىپ، بولۋى ەكىتالاي سەناريلەردى كوتەرىپ وتىرعان وتە جاعىمسىز كۇشتەر» تۇر، دەپ حابارلايدى infohub.kz سايتى.
ترامپ اقش قاجەت بولعان جاعدايدا جاساندى ينتەللەكت سالاسىندا جۇمىس ىستەيتىن كومپانيالارعا بەلگىلى ءبىر شەكتەۋلەر ەنگىزە الاتىنىن اتاپ ءوتتى. الايدا ونىڭ پىكىرىنشە، تەحنولوگيانى سىناۋشىلار «بولمايتىن نارسەلەر تۋرالى ايتىپ وتىر».
«ءبىز جاساندى ينتەللەكت سالاسىندا قىتايدان وزىپ كەلەمىز. ءبىز الەمدەگى ەڭ وزىق ەلمىز جانە شىنىمدى ايتسام، وسىلاي قالۋىن قالايمىن، ويتكەنى جاساندى ينتەللەكت جارىسىندا كىم جەڭسە، تۇبىندە سول جەڭەدى»، — دەدى اقش پرەزيدەنتى.
ەسكە سالايىق، بۇعان دەيىن Claude چات-بوتىن ازىرلەۋشى Anthropic كومپانياسىنىڭ باسشىسى داريو امەدەي نەعۇرلىم قۋاتتى جاساندى ينتەللەكت مودەلدەرىنىڭ قارقىندى دامۋىن توقتاتا تۇرۋعا شاقىرعان ەدى. ونىڭ ۇستانىمىن SpaceX نەگىزىن قالاۋشى يلون ماسك پەن OpenAI باس ديرەكتورى سەم التمان قولدادى. ماسك، اتاپ ايتقاندا، 2014 جىلى جاساندى ينتەللەكت «يادرولىق قارۋدان دا ءقاۋىپتى» بولۋى مۇمكىن دەپ ايتقانىن مالىمدەدى.