اقش پرەزيدەنتى دونالد ترامپ گازا سەكتورىندا حاماس پەن باسقا دا توپتاردى تولىق قارۋسىزداندىرۋدى كوزدەيتىن «تاريحي» كەلىسىمگە قول جەتكىزىلگەنىن حابارلادى، دەپ مالىمدەيدى infohub.kz سايتى.
بۇل تۋرالى اق ءۇيدىڭ باسشىسى ءوزىنىڭ Truth Social الەۋمەتتىك جەلىسىندە جازدى. «بۇل كەلىسىم — گازا سەكتورىنىڭ اقىرى جاڭا پالەستينا ۇكىمەتىنىڭ باسقارۋىنا وتۋىنە باعىتتالعان ماڭىزدى قادام. جاڭا ۇكىمەت بەيبىتشىلىك كەڭەسىمەن تىعىز جۇمىس ىستەپ، پالەستينا حالقىنا كومەكتەسەدى. سونىمەن قاتار، يزرايل وزىنە تيەسىلى قاۋىپسىزدىككە يە بولادى، ويتكەنى گازا ەندى تەرروريستىك شابۋىلداردىڭ بازاسى رەتىندە پايدالانىلمايدى»، — دەلىنگەن ترامپتىڭ مالىمدەمەسىندە.
ونىڭ ايتۋىنشا، بۇل 20 تارماقتان تۇراتىن «ترامپ جوسپارىن» ىسكە اسىرۋداعى ماڭىزدى كەزەڭ. كەلىسىم مۇقيات ازىرلەنگەن كەستەگە سايكەس كەزەڭ-كەزەڭىمەن ورىندالاتىن بولادى. «قارۋسىزدانۋ اياقتالعان سايىن يزرايل اسكەرلەرى شىعارىلادى، ال حالىقارالىق تۇراقتاندىرۋ كۇشتەرى جاڭا پالەستينا پوليسياسىمەن بىرگە گازا قاۋىپسىزدىگىن ونىڭ تۇرعىندارى مەن كورشى مەملەكەتتەر ءۇشىن قامتاماسىز ەتۋ جاۋاپكەرشىلىگىن ءوز موينىنا الادى»، — دەپ ءتۇسىندىردى ترامپ.
ءوز حابارلاماسىندا ول دەلدال بولعان ەگيپەت، كاتار جانە تۇركياعا العىس ءبىلدىردى.