زەرتتەۋشىلەر كوحا تاياقشاسىنىڭ rv2531c گەنى سترەسس كەزىندە گلۋتاماتتى گامك-عا اينالدىرۋعا جاۋاپتى ەكەنىن انىقتادى. بۇل جاڭالىق تۋبەركۋلەزگە قارسى جاڭا پرەپاراتتار جاساۋعا اكەلۋى مۇمكىن، دەپ حابارلايدى infohub.kz سايتى.
UF Scripps بيومەديسينالىق يننوۆاسيالار مەن تەحنولوگيالار ينستيتۋتىنىڭ بيوحيميكتەر توبى لۋيس پەدرو كارۆالونىڭ جەتەكشىلىگىمەن تۋبەركۋلەز باكتەرياسىنداعى rv2531c گەنىنىڭ جاسىرىن ءرولىن انىقتادى. جۇمىس ناتيجەلەرى PNAS جۋرنالىندا جاريالاندى. بۇعان دەيىن بۇل گەن پولياميندەردىڭ جيناقتالۋىنا قاتىسادى دەپ ەسەپتەلگەن ەدى، الايدا جاڭا دەرەكتەر مۇلدەم باسقا مەحانيزمدى كورسەتەدى.
گەن بولەتىن فەرمەنت سترەسس اسەرىنەن بەلسەندىرىلىپ، گلۋتامين قىشقىلىن جوعارى جىلدامدىقپەن گامما-امينوماي قىشقىلىنا (گامك) اينالدىرا باستايدى، بۇل كوحا تاياقشاسىنا مەتابوليزم، سيگنال بەرۋ جانە قورعانىس ءۇشىن قاجەت. كارۆالونىڭ ايتۋىنشا، قالىپتى جاعدايدا فەرمەنت جوعارى بەلسەندىلىك تانىتپايدى، سوندىقتان ونىڭ ناقتى ماقساتى ۇزاق ۋاقىت بويى بايقالماي قالدى.
عالىمدار باسقا پاتوگەندەردە، سونىڭ ىشىندە الاپەس قوزدىرعىشتارى مەن بەزگەك پلازموديلەرىندە مىڭعا جۋىق ۇقساس گەنەتيكالىق تىزبەكتەردى تاپتى. بۇل جاڭالىق انتيبيوتيكتەردى ازىرلەۋ جانە دارىگە توزىمدىلىكپەن كۇرەسۋ تاسىلدەرىن قايتا قاراۋعا مۇمكىندىك بەرەدى.