الماتى وبلىسىنىڭ قاراساي اۋدانىندا قۇتقارۋشىلار ءبىر كۇندە بىرنەشە ىزدەۋ-قۇتقارۋ وپەراسياسىن جۇرگىزدى. وقيعالار كەشە بولدى، دەپ حابارلايدى infohub.kz سايتى.
تجم Telegram-ارناسىندا حابارلانعانداي، تۋريستەردىڭ ءبىرى ۇلكەن الماتى شىڭى اۋدانىنا بارىپ، كەيىن بايلانىسقا شىقپاي قويعان. ونى ىزدەۋگە «بارىس» رجس قۇتقارۋشىلارى اتتاندى.
«قۇتقارۋشىلار ايۋ-ساي جانە پروحودنوە شاتقالدارىن، سونداي-اق تەررا الاڭى مەن الەشكين كوپىرىن تەكسەردى. ءتۋريستى پروحودنوە شاتقالىنداعى سارقىرامانىڭ جانىنان تاپتى. وعان مەديسينالىق كومەك قاجەت بولمادى. قۇتقارۋشىلار ونى تومەن ءتۇسىرىپ، الماتى قالالىق تجد قىزمەتكەرلەرىنە تاپسىردى»، — دەدى ۆەدومستۆودا.
ىزدەۋ باعىتىنان قايتىپ كەلە جاتقاندا تاعى ءبىر ءتۋريستىڭ كوسموستانسيا اۋدانىندا اياعىن جاراقاتتاعانى تۋرالى حابارلاما كەلىپ ءتۇستى. قۇتقارۋشىلار وقيعا ورنىنا باعىتتالدى. ولار زارداپ شەككەنگە العاشقى كومەك كورسەتىپ، تومەن ءتۇسىرىپ، اپاتتار مەديسيناسى ورتالىعىنىڭ بريگاداسىنا تاپسىردى.
سونداي-اق، تجم دەرەگىنشە، ساتپايەۆ شىڭىندا — 3300 مەتر بيىكتىكتە بولعان ەكى جاس جىگىت كومەك سۇراعان. ولاردىڭ ءبىرى قاتتى باس اينالۋ مەن جۇرەك اينۋىن سەزىنىپ، وزدىگىنەن قوزعالا الماعان.
«الماتى قالاسىنىڭ مونيتورينگ جانە جەدەل ارەكەت ەتۋ ورتالىعىنىڭ قۇتقارۋشىلارى جىگىتتەردى ەكولوگيالىق بەكەتكە دەيىن ءتۇسىرىپ، قاجەتتى مەديسينالىق كومەك كورسەتۋ ءۇشىن تجم اپاتتار مەديسيناسى ورتالىعىنىڭ قىزمەتكەرلەرىنە تاپسىردى»، — دەپ قوستى مينيسترلىك.
قۇتقارۋشىلار تاۋعا بارار الدىندا مارشرۋتتى الدىن الا جوسپارلاپ، قاراڭعى تۇسكەنگە دەيىن قايتۋ ۋاقىتىن ەسەپتەپ، اۋا رايى بولجامىن قاداعالاپ، جاقىندارىڭىزعا جوسپارلارىڭىزدى مىندەتتى تۇردە حابارلاۋدى ەسكەرتەدى.