تۇركىستان قالاسىنداعى «TURAN» ارنايى ەكونوميكالىق ايماعىندا توقىما ونەركاسىبىنە ارنالعان اۋقىمدى ينۆەستيسيالىق جوبا جۇزەگە اسىرىلىپ جاتىر. يەلەرى قىتايلىق Hong Kong Chang Sheng Textile Limited جانە جين ەۋيي بولىپ تابىلاتىن Hygeia Textile Kazakhstan كومپانياسى ماقتا ءيىرىمجىبى مەن دجينسى ماتا شىعاراتىن فابريكا سالۋعا 25،8 ملرد تەڭگە جۇمسايدى، دەپ حابارلايدى infohub.kz سايتى.
«تۇركىستان قالاسىنداعى «TURAN» ارنايى ەكونوميكالىق ايماعىندا توقىما ونەركاسىبىن دامىتۋعا باعىتتالعان اۋقىمدى ينۆەستيسيالىق جوبا جۇزەگە اسىرىلىپ جاتىر. اۋماعى 20 گەكتار بولاتىن ءوندىرىس الاڭىندا «Hygeia Textile Kazakhstan» ءجشس-نىڭ ماقتا ءيىرىمجىبى مەن دجينسى ماتا شىعاراتىن زاماناۋي فابريكاسى سالىنىپ جاتىر»، – دەلىنگەن تۇركىستان وبلىسى اكىمدىگىنىڭ حابارلاماسىندا.
تۇركىستان وبلىسىنىڭ اكىمدىگى كاسىپورىنعا قاجەتتى ينجەنەرلىك ينفراقۇرىلىمدى تارتۋ جۇمىستارىن جۇرگىزىپ جاتىر. اتاپ ايتقاندا، ءوندىرىس نىسانىن ەلەكتر ەنەرگياسىمەن، گازبەن، سۋمەن جانە باسقا دا ينجەنەرلىك جەلىلەرمەن قامتاماسىز ەتۋ جۇمىستارى ءجۇرىپ جاتىر.
قۇرىلىس بارىسىن باقىلاۋ ماقساتىندا تۇركىستان وبلىسى اكىمىنىڭ ورىنباسارى قانات قايىپبەك اۋدانى 290 گا بولاتىن TURAN ارنايى ەكونوميكالىق ايماعىنىڭ قوسالقى ايماعىنا بارىپ، Hygeia Textile Kazakhstan وكىلدەرىمەن كەزدەسىپ، قۇرىلىس جۇمىستارىنىڭ بارىسىن تالقىلادى.
وبلىس اكىمىنىڭ ورىنباسارى جاۋاپتى تۇلعالارعا جوبانى ينجەنەرلىك ينفراقۇرىلىممەن تولىق قامتاماسىز ەتۋ جۇمىستارىن جەدەلدەتۋدى، تۋىنداعان ماسەلەلەردى ينۆەستورمەن بىرلەسىپ ۋاقتىلى شەشۋدى جانە ءار باعىت بويىنشا ناقتى جۇمىس كەستەسىنىڭ ساقتالۋىن قامتاماسىز ەتۋدى تاپسىردى. سونىمەن قاتار ينۆەستورلارعا وندىرىستىك عيماراتتاردىڭ قۇرىلىسىن ساپالى جانە بەكىتىلگەن كەستەگە سايكەس اياقتاۋدى، قاجەت بولعان جاعدايدا قۇرىلىس الاڭىنداعى جۇمىسشىلار مەن تەحنيكا سانىن كوبەيتۋدى جانە ەڭبەك قاۋىپسىزدىگى تالاپتارىن قاتاڭ ساقتاۋدى تاپسىردى.
ماقتا ءيىرىمجىبى مەن دجينسى ماتا ءوندىرۋ جوباسىنىڭ جالپى قۇنى 25،8 ملرد تەڭگە. كاسىپورىننىڭ ءبىرىنشى كەزەڭىن 2026 جىلدىڭ سوڭىنا دەيىن ىسكە قوسۋ جوسپارلانىپ وتىر. تولىق قۋاتقا شىققاندا جوبا شامامەن 1000 جۇمىس ورنىن اشادى.
جوباداعى قۇرىلىس جۇمىستارىن تۇركىستاندا تىركەلگەن Qaz Build Elements كومپانياسى جۇرگىزىپ جاتىر. ونىڭ جالعىز يەسى ءارى باسشىسى – داۋن حونگسيان. وسىلايشا، ءىرى نىساننىڭ قۇرىلىسىندا قىتايلىققا تيەسىلى كومپانيا جۇمىس ىستەپ، تابىس تابادى.
اكىمدىك دەرەگىنشە، نىسانداعى جاتاقحانا مەن كەڭسە عيماراتتارىنىڭ قۇرىلىسى اياقتالۋعا جاقىن. ەكى وندىرىستىك كورپۋستا جەر قازۋ جۇمىستارى، ىرگەتاس قۇيۋ، بەتونداۋ جانە مەتالل كونسترۋكسيالاردى مونتاجداۋ اياقتالدى. قۇرىلىسقا ءتورت تەحنيكا مەن 40-قا جۋىق جۇمىسشى جۇمىلدىرىلعان. كاسىپورىندى قاجەتتى ينجەنەرلىك ينفراقۇرىلىممەن قامتاماسىز ەتۋ جۇمىستارى دا اياقتالۋعا جاقىن.
Hygeia Textile Kazakhstan جوباسى ماقتا شيكىزاتىن تەرەڭ وڭدەۋدى قامتاماسىز ەتىپ، دايىن ءونىم كولەمىن ارتتىرادى. Hygeia Textile Kazakhstan باسشىسى – جين ەۋيي، قوس يەسى: جين ەۋيي (ول قازاقستاندىق كومپانيانىڭ قوس يەسى 2026 جىلعى 14 شىلدەدە اتاندى) جانە قىتايلىق Hong Kong Chang Sheng Textile Limited (قازاقستاندىق كومپانيا تىركەلگەن 2025 جىلعى 4 شىلدەدەن باستاپ ونىڭ قۇرىلتايشىسى).