تۇركىستان وبلىسىندا وتباسىلىق جانجال كەزىندە ايەل كۇيەۋىن وقتاۋمەن قاتتى ۇرىپ، كوزىنەن ايىرا جازدادى. وقيعانىڭ ۆيدەوسى الەۋمەتتىك جەلىدە تاراپ، پوليسيا قىلمىستىق ءىس قوزعادى، دەپ حابارلايدى infohub.kz.
«كريمينالنىي كازاحستان» Telegram-ارناسىنىڭ مالىمەتىنشە، زارداپ شەككەن كىسى پوليسيا شاقىرعان، ءبىراق ونىڭ ايتۋىنشا، ەشكىم كەلمەگەن. كەيىن ەر ادامدى اۋرۋحاناعا جەتكىزىپ، وندا ول ارىز جازعان. زارداپ شەگۋشىنىڭ تۋىستارى مۇنداي وقيعالار بۇرىن دا بولعانىن ايتىپ، ايەلدى جاۋاپكەرشىلىككە تارتۋدى تالاپ ەتكەن.
تۇركىستان وبلىسى پوليسيا دەپارتامەنتىنىڭ حابارلاۋىنشا، الەۋمەتتىك جەلىدە ۆيدەو پايدا بولعاننان كەيىن تەكسەرۋ جۇرگىزىلگەن. «الدىن الا انىقتالعانداي، جانجال تۇرمىستىق سيپاتتا بولعان. جابىرلەنۋشى تاراپتاردىڭ تاتۋلاسقانىن، شاعىمى جوق ەكەنىن ايتىپ، ساراپتامادان وتۋدەن باس تارتتى»، – دەلىنگەن دپ ءباسپاسوز قىزمەتىنىڭ مالىمدەمەسىندە. وسىعان قاراماستان، ايەلگە قاتىستى قورعاۋ نۇسقاماسى شىعارىلىپ، تۇرمىستىق زورلىق-زومبىلىققا جول بەرمەۋ تۋرالى پروفيلاكتيكالىق اڭگىمە جۇرگىزىلگەن.
سونىمەن قاتار، پوليسەيلەر قازاقستان رەسپۋبليكاسى قىلمىستىق كودەكسىنىڭ 108-1-بابىنىڭ 2-بولىگى «دەنساۋلىققا قاساقانا جەڭىل زيان كەلتىرۋ» بويىنشا قىلمىستىق ءىس قوزعادى. «بارلىق ءمان-جايلاردى انىقتاۋعا باعىتتالعان قاجەتتى شارالار جۇرگىزىلۋدە. تەرگەۋ ناتيجەسى بويىنشا ءتيىستى شەشىم قابىلدانادى»، – دەپ اتاپ ءوتتى پوليسيادان.
دەپارتامەنت وكىلدەرى قازاقستان رەسپۋبليكاسى قىلمىستىق-پروسەستىك كودەكسىنىڭ 201-بابىنا سايكەس، تەرگەۋ مۇددەسىندە وزگە اقپاراتتىڭ جاريا ەتىلمەيتىنىن قوسىمشا ايتتى.